Esti llagar navetu presentó la so sidre acoyío a la DOP Sidre d’Asturies nel nuevu equipamientu Club Isidra, un ambiciosu y orixinal proyeutu que yá ta en marcha
LA SIDRA.- Nel díi d’ayeri presentóse la nueva marca d’El Piloñu acoyía a la DOP sidre d’Asturies, con una tastia abierta al públicu, gratuita y maridada con quesos y embutíos ‘supreme’, a la qu’asistieron distintes presonalidaes del mundiu la sidre, como ye’l casu del presidente de la mentada DOP, Guillermo Guisasola, al llau del so xerente Daniel Ruiz, la campiona echaora Laura Ovín, o los collaboradores de la revista LA SIDRA, David Martín y Manuel G Busto.
Una xornada la d’ayeri vienres bien allegada y con previsión de siguir superándose cola aceptación y bona acoyida que na redolada espertó la nueva esperiencia sidrero-gastronómica.
Pa la ocasión ufiertábase un menú especial pa dos presones con productos asturianos IGP por 25€ que, al igual que’l menú de diariu, inclúi agua y sidre. Si quies otra bébora, aparte. Siendo asina’l primer Restorán Sidreria que “namás” sirve sidre (con o ensin alcohol) y agua, incluyíes toes nel menú diariu.
El Club Isidra abrió apocayá les sos puertes con un ampliu proyeutu de clú esportivu, d’ociu, esperiencies gastronómiques y cultura sidrera asturiana .
Asitiáu estratéxicamente na C/ Dinamarca d’Uviéu, atópase a un pasu del centru comercial Parque Principáu y de la autopista Y.
Isidra cunta cola mayor variedá de sidre asturiano que pueda atopase, asina como una amplia representación de sidres internacionales.
