“Esti ye un eventu pa potenciar la cultura de la sidre asturiano, una cultura a piques de ser reconocida como Padremuñu Inmaterial de la Humanidá y que engloba muncho más qu’una bebida”
LA SIDRA.- Esta mañana tuvo llugar na sede de la AAVV de Cimavilla la rueda de prensa na que se presentó’l programa y actividaes de la XIV Primer Sidre l’Añu, que va abrir les sos puertes el xueves 28 a la una del mediudíi col pregón al cargu de Carlos Rubiera.
Na rueda de prensa tuvieron presente Marcos Abel Fernández, presidente de la Fundación Asturies XXI, Llucía Fernández, organizadora de les actividaes de la PSLA, Antonio Migoya, Secretariu Xeneral de la Fundación Caxa Rural –entidá collaboradora-, Alfonso Prado y Pedregal, del llagar La Morena, sidra oficial d’esta XIV PSLA y una representación de la AAVV de Cimavilla, anfitriones del eventu.
Na so intervención Marcos Abel incidió nes dificultaes a les que la organización tuvo d’enfrentase por cuenta de la controvertía y arbitraria decisión d’echar l’eventu del Muséu del Pueblu d’Asturies y la tardanza cola que’l Conceyu otorgó’l permisu para reasitialo en Cimavilla, alegando que l’otru allugamientu propuestu pola Fundación, el Parque Hermanos Castro, ta “n’una zona bien poblada”. Afortunadamente, matizó, atopáronse con una respuesta rápida y eficiente per parte del funcionariáu de la Casa Conceyu, lo que permitió tener tou en riegla a tiempu.
Llucía Fernández presentó a la prensa les munches actividaes incluyíes nel programa, yá que, como recordó “esti ye un eventu pa potenciar la cultura de la sidre asturiano, una cultura a puntu de ser reconocida como Padremuñu Inmaterial de la Humanidá y que engloba bien de más qu’una bebida”.
Dientro del programa destacó’l protagonismu de les actividaes pensaes pa la reciella y families, yá que “trátase non solo de caltener viva esta cultura sinón de tresmitila a les siguientes xeneraciones”. Asina, tolos díes podrán practicase esportes y xuegos tradicionales, va haber talleres variaos y mayaráse sidre colos rapacinos, que tamién van poder probar a echar.
Los mayores van tener tamién esa oportunidá, colos talleres d’echar sidre, que van rematar con un concursu d’echadores amateurs na tarde del sábadu. El domingu va tener llugar el Concursu de Sidre Casero Fecho en maera. Amás, van realizase abondes tasties guiaes nes que conocer otros tipos de sidre y productos sidreros d’otros países.
Tou ello, incluyio nos diez euros que cuesta la entrada y que permite esfrutar de más de 40 tipos de sidre, ente los toneles d’autoserviciu y la barra onde un equipu d’echaores van encargase d’echala curioso pa garantizar que ta en bones condiciones.
Ente tola sidra que va tar disponible destaca la de Prau y Pedregal, sidre oficial de la XIV PSLA dempués de ganar el concursu de la Meyor Primer Sidre l’Añu. Alfonso Prao y Pedregal, llagareru de La Morena, declaró sentise arguyosu de consiguir esta reconocencia, “compitiendo con tantos llagares de tanta sonadía como los participantes nel certame”. Ye la tercer vegada que La Morena consigue esti galardón, siendo’l llagar más vegaes premiáu. De la sidra ganador, la DOP del so llagar, destacó la frescura y l’arume que caractericen la sidra nuevo.
La XIV Primer Sidre l’Añu va cellebrase nel Auditoriu Dr. Francisco Cienfuegos Xovellanos, en Cimavilla, ente’l vienres 28 y el domingu 31 de marzu.
¿QUÉ YE’L SIDRACRUCIS? / ¿EN QUÉ CONSISTE? / PERCORRÍU SIDRACRUCIS’24 / VIDIOS Y SEMEYES
PRIMER SIDRE L’AÑU / CONCURSU DE SIDRE CASERO / CONCURSO AMATEUR D’ECHAORES
Pa recibir el PDF de la revista LA SIDRA fai falta tar dáu/da d’alta nel whatsapp de LA SIDRA
