Tendrá llugar güei a les 12 hores na Casa la Palmera en Xixón, y cuntará con tastia de la sidre La Morena, llagar ganaor de La Meyor Primer Sidre L’Añu y sidre oficial de la VII PSLA.
LA SIDRA.- Güei tendrá llugar en La Casa de la Palmera en Xixón la presentación de la VII edición de la Primer Sidre L’Añu –PSLA–. Va escomenzar a les 12:00 hores y nella esplicaránse refechamente les actividaes culturales, esportives y gastronómiques que van tener llugar los díis 24, 25, 26 y 27 de marzu nel Muséu del Pueblu de Asturies. A la fin del actu va agasayase a los miembros de la prensa con una botella del llagar La Morena, cuya sidre foi la ganadora de la Meyor Primer Sidre L’Añu y que por tantu convirtióse na oficial de la PSLA.
Na presentación van intervenir: Laura Uría Tomás en representación de la Fundación Asturies XXI y de la revista LA SIDRA; Xosé Mª García “Llábana”, direutor de l’amuesa Asturianada y Sidre; Falu Caldones, responsable de les actividaes d’artesanía, mayada y animación infantil; y Alfonso Prado, del llagar La Morena. Al actu tamién van allegar Jorge González-Palacios y Teresa Sánchez, de Divertia.
El xueves 24 de marzu a les 13:00 hores va tener llugar la inauguración de la Primera Sidre L’Añu al cargu de los trabayadores de Gijón Fabril. Tamién se va cuntar cola presencia de: Jesús Martínez Salvador, conceyal de Turismu y Festexos de Xixón; el yá citáu propietariu del llagar La Morena; y miembros de les distintes confraderíes gastronómiques asturianes. El campión echaor de sidre 2015, Jorge Vargas, va ser quien eche’l culín inaugural.
Comu n’años anteriores, na PSLA va haber una notable ufierta cultural, llúdica y gastronómica con esibiciones, talleres, tasties guiaes, cocina en vivu, música y baille del país, esportes tradicionales y artesanía. Amás, estia ñu va ponese especial atención a los más piqueños yá que se proyeutó un ampliu abanicu d’actividaes alrodiu la nuesa bébora tradicional pa que los neños deprendan, y sobromanera, diviértantes. Y por supuestu que nun va faltar sidre dulce y ensin alcol, pa que tol públicu pueda esfrutar al másimu.
Con La Primera Sidre L’Añu, eventu entamáu pola revista LA SIDRA y la Fundación Asturies XXI en collaboración con Divertia Xixón; empecípiase la temporada sidrera asturiana, siendo yá un alcuentru de referencia onde cultura, ociu, tradición y gastronomía van de la man. Nelli, recupérase la tradición de les espiches de Selmana Santa y del consumu de la sidre nuevo y ensin trasegar.
Pa más información puede visitase la páxina ueb: www.lasidra.as; y les redes sociales: https://www.facebook.com/lasidrainfo, revistalasidra en Twitter y revistalasidra en Instagram.
