L’amuesa de semeyes finalistes del XV Concursu de Semeyes LA SIDRA da entamu a una selmana bien sidrera en Cangues, onde amás va cellebrase, del 19 a l 21 d’esti mes, la I Primer Sidre de Cangues
Güei abrióse al públicu na Casa de Cultura de Cangues d’Onís la esposición de les semeyes ganadores del XV Concursu de Semeyes LA SIDRA, que van permanecer n’esposición hasta’l próximu 31 d’agostu. Alluga un total de 20 obres en gran formatu, ente les que s’atopa la ganadora del concursu, los dos áccesits y la ganadora del Premiu JR, acompañaes d’otres 16 semeyes que tamién resultaron finalistes.
Trátase d’un concursu internacional, entamáu pola Fundación Asturies XXI, col patrociniu del llagar JR y el sofitu de l’Asociación Asemeyando y de la revista LA SIDRA, que yá tien convocada la so XVI edición con fecha tope pa presentación d’obres el 2 de setiembre.
Na presentación Llucía Fernández, de la Fundación Asturies XXI, resaltó’l compromisu de Cangues cola sidra y la so cultura “y como quiera que ye un llugar turísticu, guapu y mui visitáu, siempres foi un magnificu escaparate pa dar a conocer esta cultura al mundu”.
Esti compromisu refléxase, como destacó Llucía, na incorporación de Cangues a la acabante crear Rede Europea de Ciudaes de la Sidra –Cider Cities-, organización impulsada por Asturies XXI y que yá aconceya a ciudaes de cinco estaos d’identidá estrechamente venceyada a la sidre, y na so participación nel proyectu CIDEREU na Xunión Europea, con una planificación alredor de la cultura de la mazana y la sidre que va desendolcase a lo llargo de 2025-2026.
Nel mesmu actu presentóse l’eventu sidreru Primer Sidre de Cangues, que se va celebrar na que foi la primer capital de Asturies los díes 19, 20 y 21 de xunetu, nel Parque Riera.
La cita sidrera va tener un formatu asemeyau al de la Primer Sidre l’Añu, que lleva 14 ediciones cellebrándose en Xixón. Con una entrada de diez euros –pa los mayores d’edá- podrá esfrutase de tola sidre que se quiera, dende la una de la tardi a les nueve y media de la nueche; pero como destacó Llucía, nun se trata a cencielles de tomar sidra, na Primer Sidre sucederánse actividaes llúdiques, culturales y sidreres, con participación de baldre pa quienes entren al eventu.
Asina, tolos díes va haber música tradicional en directu, talleres d’ellaboración de sidre’l duernu, esibiciones y talleres d’echar sidre, xuegos tradicionales, conciertos, tasties guiaes de distintes sidres, destacando el vienres l’homenaxe a Jose Manuel Fonseca “El Polesu” y el domingu, una preba de sidra casero d’ellaboradores de la zona. y el domingu, una preba de sidra casero d’ellaboradores de la zona.
Anque’l llagar oficial d’esta Primer Sidre ye Sidra Riestra, va tar disponible sidre d’otros más de diez llagares, tratando de dar una visión amplia de l’actualidá sidrera asturiana.
“Una ocasión perbona pa que los sidreros esfruten de la sidre y la cultura asturiana como más nos presta y la meyor manera de dar a conocer esta cultura a quien vien de fora: viviéndola en directu, compartiendo con nós nuesa forma d’entender la sidre como más qu’una bebida, porque, eso sabémoslo toos, la sidra ye muncho más, ye una forma de rellacionase, de sentir, de tar, de vivir”.
Xúnite a la nuesa canal de WhatsApp
