El llugar escoyíu p’aconceyar el xuráu que concederá los prestixosos Premios SISGA sedrá’l Llagar Castañón. Una firma que ta de norabona yá que, namás nesti añu, ganó cola so marca apautada a la Denominación d’Orixe Protexía, Val de Boides, dos de los festivales de la sidre más importantes del país: el que se lleva a cabu en Nava y el que tien llugar en Villaviciosa.
El xuráu tará compuestu por un tribunal internacional proveniente de los llagares participantes, asina como de profesionales del seutor y especialistes nesta bébora. Ente los países colos que se cuntará nesti Salón Internacional de les Sidres de Gala alcuéntrense Francia, Alemaña, Lituania, Italia, Estaos Xuníos, Holanda, Portugal, Reinu Xuníu, Filandia o Polonia, amás de cuntar con representación d’otros territorios del Estáu español como Euskadi o Llión.
La sidre pasará una duple peñera, na primera fadráse una primer esbilla de la sidre presentao y la clasificao sedrá valorao por un xuráu oficial, de reconocíu y prebáu prestixu ya independencia.
Los xueces fadrán una tastia a ciegues de la sidre presentao y darán la so puntuación a cauna d’elles. El concursu tará xebráu n’estremaes categoríes: sidres brut, esplumoses dulces, esplumoses semiseques, rosaes, ellaboraes con otros frutos, en botellín, de mesa seques o semiseques, llicores, auguardientes de sidre o aperitivos. Asina d’ampliu ye l’abanicu de los productos que tan sacándose al mercáu, y d’ende la necesidá de valorales a toes na clas que-yos correspuenda.
VIII SALÓN INTERNACIONAL DE LES SIDRES DE GALA -SISGA’18-
VER ARTÍCULU LA SIDRA / VER PREMIOS SISGA’17 / VER SEMEYES DEL SISGA’17
