Los llagares asturianos algamaron 3 de los 14 PREMIUM que concede el Salón Internacional de les Sidres de Gala
Ayeri repartiéronse los prestixosos Premios SISGA, internacionalmente reconocios pola so alta desixencia ya estricta imparcialidá, lo que yos apurre una especial relevancia nel entornu sidreru.
Los llagares asturianos quedaron en bon llugar, con 11 premios y tres de los 14Premium, que les reconocen como les meyores na so categoría
La entrega de los Premios SISGA ’24 tuvo llugar na mañana d’ayeri nel trescursu del Brunch de Gala, rializáu nel Restorán Finca El Duque.
El prestixu internacional d’estos premios, a los qu’optaron 228 productos de más de cien llagares repartíos per tol mundiu, débese principalmente al so sistema de xuráu, nel que ca llagar asistente apurre un miembru, completándose con una mesa presidencial d’espertos escoyía pola Fundación Asturies XXI.
El sistema de puntuaciones otorga un bronce a aquellos productos que consigan pente 60 y 69 puntos nes valoraciones de los xuraos, plata a los que ten pente los 70 y los 85 y oru a les sidres que pasen de los 85, escoyéndose depués la meyor sidre de ca categoría pa recibir el naguau reconocimientu Premium.
El xuráu, aconceyáu el pasáu vienres 27 de setiembre decidió repartir un total 20 oros, 41 plates y 14 bronces, entregándose amás 14 premiums, que reconocen les meyores sidres en cada categoría.
Asturies algamó un total d’once premios, con tres Premium, un oru y siete plates. Como novedá esti añu entregóse un premiu especial al Meyor Llagar del SISGA, que recibió el llagar Jaanihanso, d’Estonia, en consideranza a los puntos algamaos, a la variedá de productos y a la presentación del so stand.
Comu preslle a la ceremonia nomáronse a dos nuevos embaxadores del SISGA nel mundiu, Maris y Dace Plume, de Letonia. Con ellos son seis los países que cuenten con representantes qu’esparden la filosofía SISGA de compromisu sidreru: Portugal, Xapón, Chequia, Francia, Euskal Herria y agora Letonia.
PREMIUMS:
| Sidre de copa seco | Numata Apples Dry Ex-Brut | Fukiware Cidrerie | Xapón |
| Sidre de copa semiseco | Sidra de poma | Mooma | Catalunya |
| Sidre de copa dolce | Numata Apples Sweet | Fukiware Cidrerie | Xapón |
| Sidre d’espolleta brut | Ramos del Valle Brut | Sidra Fran | Asturies |
| Sidre d’espolleta semiseco | Abolu Sidrs Pussalds | Lauskis | Lituania |
| Sidre d’espolleta dolce | Bimengold | Manufaktur Jörg Geiger | Alemania |
| Sidre d’espolleta dolce gasificao | La Petri | Petritegi | Euskal Herria |
| Sidre con saborgos | Craft Cider – Schwäbischer Kir | Manufaktur Jörg Geiger | Alemania |
| Sidre de xelu | Sidra de hielo | Guzmán Riestra | Asturies |
| Sidre de fueu | Su-Sagardoa | Kuartango Sagardotegia | Euskal Herria |
| Sidre de pera | CBB 2014 | Manufaktur Jörg Geiger | Alemania |
| Llicor de sidre | BP | Manufaktur Jörg Geiger | Alemania |
| Aguardiente de sidre | La réserve de Pierre | Maison Ferré | Francia |
| Vermú | Roxmut | Llagar Castañón | Asturies |
| Non-Alcoholic 0% | Stonewell Non-Alcoholic 0% | Stonewell | Irlanda |
