El martes 10 de xineru fina’l plazu pa participar nel X Concursu Semeyes la Sidra
LA SIDRA.- El tiempu pasa inexorablemente. Y yá son 10 les ediciones del nuesu concursu de Semeyes de la Sidre, un concursu que reflexa la sidra, la mazana, el so alrodiu, la so cultura. Yá son 200 les semeyes impreses en gran formatu y esibíes por toa Asturies.
Añu a añu, medra la participación y la calidá de les semeyes presentaes. Tuvimos ganadores d’otros países y d’otres nacionalidaes, lo mesmo que de dientro y de fora d’Asturies .
Un certame que cumple la so primer década nun podía enllancase, una vegada consolidáu y reconocíu. Buscóse la forma de dar un saltu cualitativo y cuantitativo que lo asitie ente los certames de mayor prestíu fotográficu, ensin qu’ello implicara’l que los aficionaos tuvieren qu’arrenunciar a poder concursar coles mesmes oportunidaes y que se vieren reconocíos por xuraos d’avaláu prestixu.
Por eso nesti X aniversariu quinxímos consolidar esti concursu y dar un pasu alantre. Pa ello encorgóse la organización del mesmu a Asemeyando asociación fotográfica.
Y ye por ello que dende Asemeyando xestionaron la so inclusión nos certames de fotografía reconocíos pola Confederación Estatal de Fotografía, lo qu’implica una reconocencia al concursu, a les sos bases y a los sos gallardones. El concursu va cuntar anguaño col siguiente rexistru: Y/2017/2
Ello implica afayar les bases del concursu a les más altes normes de tresparencia y cumplimientu de la llegalidá vixente. Implica la presencia d’un xuráu qu’hai de cumplir altos estándares a la d’otorgar los premios, ya implica la reconocencia oficial de les 25 semeyes meyor clasificaes.
El nuesu concursu conviértese amás en prácticamente l’únicu concursu con reconocencia oficial nel Estáu español de calter gratuitu pa los sos participantes. Asina mesmo conviértese nel primer concursu de semeyes convocáu n’Asturies con reconocencia oficial.
Tamos ciertos de qu’ello va implicar tantu una nueva medría en participación, como na calidá de les obres presentaes. Asina mesmo nun mos cabe dulda de que va redundar nel aumentu del interés de la comunidá artística pola sidre, el so arrodiu y la so cultura, y que per ende va contribuyir al so espardimientu fora de los territorios asturianos.
Y este ye’l primer pasu d’un proyeutu de xorrecimientu empobináu a convertilu nun certame de reconocencia internacional nel que los oxetivos del mesmu seyan conocíos y espublizaos a nivel global, esperando y presuponiendo qu’ello va atrayer l’atención d’una forma destacada sobre los oxetivos del mesmu.
Los fotógrafos federaos van poder llograr puntos pal so curriculum y los ensin federar nun se van ver afeutaos de denguna manera, anque si nel futuru se federaren los posibles puntos llograos son-yos acutaos fasta esi momentu.
Esperamos les vueses semeyes, illusionaos con esta nueva etapa, que de xuru mos dará grandes allegríes a toos.
