Foi impartía por Nacho Manzano y el sumiller Juan Luis García, y entamada pola DOP Sidre d’Asturies-
LA SIDRA.- Segunda xornada en Madrid Fusión y foi un díi clave pa la sidre, en concreto pa l’acoyía a la Denominación d’Orixe.
El xef Nacho Manzano y el sumiller Juan Luis García fixeron un harmonizaxe de sidre DOP colo meyor de la nuesa gastronomía. Escomenzóse con un quesu Gamonéu y la sidre DOP Prado y Pedregal del llagar la Morena.
La sidre echólo Natalia Alonso, presidenta de l’Asociación d’Echaores d’Asturies. Llueu, unes llámpares con salsia de sidre, lloréu y una misquinina de guindilla que se maridó cola sidre calistrao Españar del llagar El Gobernador.
El siguiente platu foi una interpretación de la “Merluza a la romana”, pero claro, en manes de Manzano. La merluza foi cocinada al vapor -a 65 graos-, con pil pil y una emulsión d’ensalada. La criación combinóse coles sidres Pomarina y Poma Áurea de Grupu El Gaiteru y de Grupu Trabanco respeutivamente.
Y como non, pa finar, les fabes, productu más que simbólicu del nuesu país. Estofaes con birigüetos llevaben amás caldu de pita, sidre, xerez, ocle y un taquín de picante. Por supuestu que toes estes ellaboraciones tienen que ser descrites muncho más detalladamente pa poder tresmitir -na midía los posible- toles sos cualidaes organoléptiques. Pero habrá d’esperar a la prósima edición de LA SIDRA pa describiles a fondu y mostrales n’imaxes.
Pela mañana, la conseyera de Desendolcu Rural y Recursos Naturales Maria Jesús Álvarez, y el direutor xeneral de Desendolcu Rural y Agroalimentación visitaron l’estand d’Asturies. “Yera una demanda que taba pidiéndose y tamos colo meyor de los nuesos productos” siñaló la conseyera a esta revista.
Nesi mesmu espaciu, güei tamién lleváronse a cabu estrames tasties de quesos asturianos, choscu de Tinéu, embutíos, miel y marañueles.
Ellí tamién hebio sidre: Pomarina y Españar, les ganaores del pasáu salón DOP Sidre d’Asturies nes sos respeutives categoríes: brut y calistrada. Y por supuestu, echóse sidre demientres tol díi na puerte l’edificiu de la Feria de Madrid. Mañana muncho más.
Tamién sedrá ún de los momentos estelares pal nuesu país yá que se rializará el taller “Cocinando nel Parayisu, productos d’Asturies a 12 manes”, una orixinal actividá entamada por Turismu d’Asturies na que se cuntará colos seyes cocineros con estrella Michelín. Ellos amosarán como trabayen con productos asturianos de la mar y la montaña convirtiéndolos nuna delicia creativa enraigonada al tarrén.
