Plan Estratéxicu de la Sidre y la Mazana

La direutora xeneral de Desendolcu Rural, Mª Jesús Aguilar anuncia que por fin ta trabayándose nun Plan Estratéxicu, con horizón en 2030

Too paez indicar que l’indispensable Plan Estratéxiu de la Sidre, que con tanta reiteración desiximos dende la revista LA SIDRA, pue llegar a ser una rialidá, a lo menos eso indiquen les declaraciones rializaes por Mª Jesús Aguilar, direutora xeneral de Desendolcu Rural, qu’afirma que yá ta trabayándose nel mesmu pa conocer cuales son les necesidaes, faltes y previsiones del seutor y marcándose como horizón el 2030.

L’ausencia de dichu Plan Estratéxicu venía siendo denunciao pola revista LA SIDRA dende va años, siendo una reclamación ca vegada más asumía pol seutor de la sidre y la mazana, coscientes de qu’ensin el mesmu nun ye posible siguir avanzando. A estes altures nun esisten datos fidedignos nin de la produición de mazana nin de sidre, nin del consumu rial, nin una mínima trazabilidá del productu, munchísimo menos esiste una planificación, unos oxetivos, nin una valoración de resultaos.

Fasta la fecha, el “Principado” llimitóse a rializar munches declaraciones públiques ensin conteníu rial, a dar aídes y subvenciones ensin un criteriu estrictu nin una programación conocía, y a permitir que’l seutor siguiera avanzando gracies al so propiu dinamismu.

Disponer d’un Plan Estratéxicu permitiría saber haza onde se dirixe’l seutor, enfrentase al tremendu problema prevocáu poles polítiques del Estáu español sobro Asturies, especialmente no que cinca a la destruición del texíu socio-económicu asturianu y a la emigración forciao de la mocedá y que tan prevocando una debacle poblacional ensin precedentes, lo que supón -ente otres coses- un perimportante amenorgamientu del mercáu potencial de la sidre, y augura unes mayores dificultaes a curtiu plazu.

Por si non fuera abondo, la desindustrialización xabaz a la que ta sometíu’l nuesu país fai que’l seutor de la sidre y la mazana alquiera una mayor relevancia proporcional, siendo de los pocos que -gracies a nun depender de decisiones estatales- caltién la so vitalidá y tien opiciones a convertise nun auténtidu fautor de desendolcu económicu n’Asturies.

La esistencia del Plan Estratéxicu permitiría conocer cuala ye la situación rial de la sidre y la mazana n’Asturies, planificar, fixase oxetivos, valorar resultaos, rializar inversiones, incentivar el desendolcu con aídes y sovenciones con criterios conocíos y oxetivables, finar coles “ocurrencies” y les redes clientelares establecíes istitucionalmente… Ye imprescindible.

Esperemos que col Plan Estratéxicu nun pase como cola candidatura de la Cultura Asturiana de la Sidra como padremuñu inmaterial de la Humanidá pola Unesco, anunciada hai más de 10 años pol “Principado”, ensin que tovía nun fixeren un res.

* Marcos Abel Fernández