Una propuesta qu’amás de deliciosa, ye perafayaíza pa reconfortamos y lluchar escontra’l gripe o’l catarru
LA SIDRA.- Tamos yá en plena temporada de fríu y munches vegaes prúyemos tomar una bébora caliente pa reconfortamos o pa lluchar escontra catarros y gripes varios. L’añu pasáu yá propunxéremos nesta mesma revista l’ellaborar sidre caldio, que tuvo abondo ésitu. Polo qu’entós agora espublizamos otra propuesta, un nueu preparáu llamáu ‘ponche de mazana ya hibiscu’.
Lo primero, ¿a qué mos referimos con ponche? Son delles les acepciones d’esta pallabra, pero nesta ocasión referímomos al caldu que se llogra al poner a cocer estremaes frutes de temporada. Pal nuesu ponche, lo primero que vamos faer ye poner a ferver trés llitros d’agua. En cuanto’l líquidu caleza vamos amestar 250 gramos de zucre moreno o panela, y una ramina canela. Lo siguiente que vamos echar na potavan ser cuatro o cinco mazanes en cachos, y media taza de flores d’hibiscu deshidrataes.
N’Asturies esti ingrediente viéndese secu en tiendes eco o tamién podemos atopalu nos llocutorios onde viendan productos árabes o llatinos. Una vegada que l’agua con toos esos elementos suelten el primera fervor, tapamos, ponemos a fueu baxo, y dexamos cocer demientres unos quince minutos. Fechu esto yá pue bebese’l ponche caldiu o fríu. Amás, tamién se-y puede estrumir el zusmiu de mediu llimón o de media naranxa pa llograr un saborgu llixeramente más ácedu, como mos presta a los asturianos. Hai que señalar que l’hibiscu, amás d’amenorgar la grasa corporal, ye un gran antiosidante, al igual que la mazana.
Una cosa más… si quier un pocu más “allegre”, puede amestáse-y un pocu d’aguardiente de sidra. Va-y xenial.
