L’uvieín impúnxose nesta preba que se cellebró na Plaza Mayor de Xixón.
LA SIDRA.- Foi una final d’infartu. Pablo Álvarez de la Sidrería Alberto d’Uviéu ganó esta etapa del Campionatu Oficial D’Echaores. Por bien pocu, bien pocu, por 0,20 décimes impúnxose a Wilkin Aquiles de les sidreríes El Mallu de Xixón.
Foi la puntuación de “estilu” la que-y arrampuñó’l premiu al dominicanu Wilkin Aquiles que tamién realizó un escelente llabor. Nel tercer puestu quedó otru de los grandes, Jeison Franco d’El Madreñeru de La Pola Sieru. Na categoría llocal Eduardo Fernández de la Sidrería Los Pomares de Xixón foi’l vencedor.
El concursu escomenzó a les cinco la tardi na Plaza Mayor. Cientos de presones axuntárense pa ver a los meyores echaores d’Asturies. Sentíase respetu, y muncho, por esti arte nel ambiente. El silenciu reinaba ca vegada qu’ún de los participantes xubía al prosceniu. Enrique Tuya, coordinador del campionatu, foi’l presentador del concursu y demientres les más de dos hores que duró, tuvo compartiendo les sos conocencies como espertu echaor. Tamién emocionaron al públicu Giselle Duarte de Los Malluo que llogró trés culinos de “100” puntos y la piqueña Alexandra Castellanos que colos sos 9 años demostró qu’hai cantera.
