Na resolución negativa del Ayuntamientu Xixón ensiquiera nun se menciona tal argumentu
LA SIDRA.- A la escontra de les declaraciones que se-y atribúin a la Conceyala de Cultura, Montserrat López, en rempuesta a les entrugues rializaes pola conceyala d’IU, Noelia Ordieres, nun ye cierto que la negativa a que sigan utilizándose les instalaciones del Muséu del Pueblu d’Asturies debase a que la Primer Sidre L’Añu seya “un eventu multitudinariu y esa arribación supón un riesgu pal caltenimientu del espaciu museísticu”, ello ye que tal como pue comprobase nel resolvimientu del Conceyu de Xixón, l’únicu motivu acotáu para torgar siguir celebrando la Primer Sidre L’Añu nel Muséu del Pueblu d’Asturies foi una llei de 2015 que prohibe la vienta, suministru, publicidá o consumu de bébores alcohóliques en centros de les alministraciones públiques”, escaeciendo que nun pue aplicase a la Primera Sidre L’añu, porque la cultura asturiana de la sidre ta declarada Bien d’Interés Cultural pol ‘Principáu’ y ye candidata oficial a ser reconocía pola UNESCO como Padremuñu Inmaterial de la Humanidá
Ensin denguna mención a ese pretendíu “riesgu para’l caltenimientu del espaciu museísticu”
Ye más, na solicitú presentada pola Fundación Asturies XXI para faer usu un añu más de les instalaciones del Muséu del Pueblu d’Asturies, yá se plantegaba de motu proprio amenorgar l’aforu a una tercer parte de los asistentes del añu pasáu, para evitar una posible “sobrecarga”, y favorecer la presencia de families nel eventu.
Nel mesmu sentíu, dende la Fundación Asturies XXI, entidá organizadora del eventu, informen que los únicos daños sufiertos pol Muséu del Pueblu d’Asturies nestos 13 años de cellebración de la Primer Sidre L’Añu son: el reposabrazos d’un bancu, una portiella y el dispensador de papel d’un bañu, daños que fueron pagáivos íntegramente pola organización.
Asina mesmu, nos 13 años de celebración de la Primera Sidre l’Añu nunca nun se reseñó denguna incidencia d’orde públicu, nun siendo necesariu riquir atención sanitario nin policial, polo que la esmolición pola integridá del muséu o por posibles incidentes resulta inxustificada dafechu.
Denegación MPA pol Ayuntamientu Xixon
