¿Daquién pudiera atalantar que la sidre s’averase al mundiu de la hidromiel, al de los nisos o a nueva sidre de xelu de pera? Pos éstes son dalgunes de les novedaes nel mundiu la sidre de les que falamos nesti artículu empobináu a dar conocencia de delles sidres y destilaos que nel postrer añu fuimos atopando per estremaes fasteres d’Europa
LA SIDRA.- Tolos años dexamos un espaciu d’estos artículos pa falar de les anovaciones que vemos nel mundiu européu de la sidre. Munches vegaes estes anovaciones tienen ésitu y quédense ente nós. Otres vegaes nun tienen esi ésitu y pasen ensin reconocencia dala.
Poro ye verdá un fechu. Munches d’estes anovaciones de les que siempres faláremos apórtennos dende los países nos que la sidre fuere una bébora tradicional escaecía, y anguaño trabayen pola so recuperación. Son países de Centro Europa, les rexones báltiques y tamién de fasteres nes que la mazana tuviera una imaxe propia como fruta, como nes Islles Canaries, pero non como bébora, y qu’apocayá tan puxando por producila.
