Seique’l Festival tien actos dende’l martes 9 al llunes 15, el megoyu sidreru de la folixa ta pente’l vienres 12 y el domingu 14, cuando Nava acoyerá eventos tan prestosos como la degustación de sidre de Nava, la Ruta la sidre, con pipes peles cais, la entrega del Concursu de la Meyor Sidre Natural Ellaborao n’Asturies y Nava o el Concursu d’Echaores
Los concursos marcarán l’aniciu d’esta edición del Festival, nel que ta anunciada la presencia de TV2 grabando un reportaxe del eventu.
Hai que tener en cuenta que la sidre natural pasa por tres esbilles anantes d’aportar a la final, una llabor minuciosa d’escoyeta que respalda la fama d’esti concursu.
El martes día 9 el Llagar de Sorribes acoyerá la primer escoyeta del concursu a la meyor Sidre Natural Ellaborao n’Asturies y Nava, nagurándose esa mesma tardi la esposición de les obres participantes nel Concursu del Cartel Anunciador del Festival de la Sidre, nel Muséu de la Sidre d’Asturies .
El miércoles sedrá’l turnu d’escoyer les meyores sidres tranquiles y derivaos de la mazana ya’l xueves 11 la sidre natural pasará por una segunda peñera, que dirá esbillando les meyores pente toles sidres presentaes.
Entá quedará una tercera peñera, el vienres 12, anantes de que les escoyíes pasen a la Gran Final, que tendrá llugar el sábadu 13 nos soportales mesmos de la Casa Conceyu, seique la emoción caltendráse fasta les ocho de la tardi, cuando se fadrá entrega de los premios de los Concursos a les Meyores Sidres Tranquiles y Derivaos de la Mazana fechos n’Asturies y al Concursu a les Meyores Sidres Naturales Ellaboraes n’Asturies y Nava.
Xúnete al nuesu canal de WhatsApp
