Tres del actu oficial de sofitu institucional a la sidre la cita tornóse nun prestosu aconceyamientu onde toos se animaron a echar unos culinos y esfrutar de la sidre
El Muséu de la Sidra d’Asturies, en Nava, acoyó esti sábadu l’actu central de celebración del Día Internacional de la Sidre, un eventu que va garrando puxu añu tres añu y que nesta ocasión enmarcaron dientro’l festival músico-sidreru D’Sidres Folk Fest.
Los actos entamaron a les 11.30 col pasucais del grupu de baille’l país Trebeyu pel cientru de Nava, aportando al mediudíi a l’antoxana del Muséu de la Sidra, onde autoridaes de dellos conceyos, representantes d’istituciones venceyaes a la sidre, cargos políticos, llagareros –caseros y comerciales-, echaores y sidreros en xeneral esperaben pa facer la semeya de familia.
Abrió les intervenciones Juan Stové, que resaltó la importancia de la presencia de representantes d’estremaos ámbetos y conceyos, a los qu’ufrió el Muséu como puntu d’alcuentru y ventana al públicu “Tenemos que centranos en lo que mos xune”, recalcó, manifestando la so confianza de qu’esti alcuentru vaiga xorreciendo añu tres añu.
Darréu Xuan de Con dio llectura al Manifiestu del Día Internacional de la Sidre, glosando nesta ocasión el procesu de fermentaura que tresforma la sidre’l duernu pa dar llugar a la sidre.
Finalmente garró la pallabra l’alcalde de NAVA y presidente de la Fundación de la Sidra, Juan Cañal, que se mostró agradecido pola bona rempuesta y la participación nel eventu.
Aportó entos l’esperáu momentu de la semeya, que foi triple: per un lláu, autoridaes, pel otru, alcaldes de la Comarca de la Sidra y finalmente, la gran semeya que xunió autoridaes con representantes d’instituciones y organizaciones venceyaes a la sidre, una semeya tan grande que resultó complicao abarcar. Toes elles, por supuesto, botella en man y echando un culín, lo que dio pie a un posterior prestosu aconceyamientu sidreru nel que toos y toes echaben y bebien sidre, mientres Trebeyu animaba l’ambiente colos sos bailles y música.
Finalmente los participantes desplazáronse a la Plaza pa esfrutar de “13 Reyes”, una composición musical de Jonathan Sánchez Santianes, dirixida pol so hermanu Iñaki Sánchez Santianes, que trata la hestoria de trece reis asturianos, interpretada pola banda gaites La Llaguna del Torollu y la banda sinfónica del Ateneu Musical de Mieres.
Na mesma plaza, ya de tardi, tuvo llugar la siguiente actuación por parte’l dúu de música folk Baxel, que punxo’l ramu a la xornada.
