Tendrá llugar güei xueves 29 marzu a les 13:00 hores nel Muséu del Pueblu d’Asturies y Tino El Roxu echará’l culín nagural.
LA SIDRA.- Entama la temporada sidrera d’Asturies cola Primer Sidre L’Añu, la espicha más grande’l país que se cellebrará del 29 marzu al 1 d’abril nel Muséu del Pueblu d’Asturies en Xixón. La entrada a la PSLA costará 6 euros y podrá degustase sidre de más de 70 llagares.
El xueves 29 de marzu a les 13:00 hores tendrá llugar la naguración de la PSLA, festividá declarada de reigañu social pol Ayuntamientu Xixón. Acudirá’l Conceyal de Turismu, Esportes, Festexos y Mocedá de Xixón, Jesús Martínez Salvador, que fadrá una intervención en representación del Ayuntamientu; representantes de la Fundación Asturies XXI entidá entamaora; l’emblemáticu echaor y hosteleru Tino ‘El Roxu’ que echará’l ‘culín nagural’; Raúl Riestra del Llagar Riestra –yá que la so sidre foi la ganaora del certame Meyor Primer Sidre l’Añu y per ende ye la oficial de la PSLA-. Tamién cuntaráse cola presencia d’Emilio Rubio, de la sidrería La Montera Picona de Ramón, onde se llevó a cabu’l certame enantes mencionáu. Asina mesmo tamién asistirán estremaes confraderíes gastronómiques asturianes.
El vienres 30 y el sábadu 31 les puertes abriránse a les doce del meudíi a les diez de la nuechi. Esos díis rializaráse la cellebración de la VIII amuesa d’Asturianada y Sidre que cuntará cola participación de las Escuelas de Música Tradicional Manolo Quirós, y la Escuela de Música Tradicional La Quintana. L’amuesa escomenzará a les 16:00 hores.
El domingu 1 d’abril a les 13:00 hores tendrá llugar el VII Concursu de Sidre Fecho en Maera, n’onde ellaboraores de toa Asturies podrán participar cola so sidre casero. Esti concurso reivindica non solo la sidre casero, sinon la tradición de la maera na ellaboración de la sidre frente a los nuevos cascos d’acieru y de fibra de vidru.
NOVEDAES DEMENTRES LOS CUATRO DÍIS
Información multillingüe. Ca añu ye mayor el númberu visitantes de fuera’l país ya incluso vienen a cubrir esti alcuentru medios de comunicación estranxeros, por ello, cuntaráse con un equipu d’información qu’amas del asturianu y del castellano, podrá espresase n’inglés, francés, italiano y alemán.
Carpa infantil. Les actividaes pa los más piqueños son parte prioritario de la PSLA, y anque munches de les actividaes planificaes tienen llugar al aire llibre, esti añu dispondremos d’un espaciu atecháu pa ellos.
Tasties, degustaciones y harmonizaciones. Esti añu cuntaremos con una programación diario y continuo d’esta triba d’esperiencies que permite a los asistentes conocer y esfrutar de la sidre nes sos estremaes formes y variedaes nuna carpa especifica.
Menú vexetarianu. La nuesa parrilla cuntará esta edición per primer vegada con un menú vexetarianu, dando rempuesta asina a una demanda ca vuelta más xeneralizada ente los asistentes al nuesu eventu.
¡Bebi con xacíu! Anque la llexislación española entá nun lo desixa, asumimos los principios europeos nos que l’anunciu d’actividaes rellacionaes col alcol tienen de llevar un llamamientu al so consumu responsable y moderao, de tala miente que l’eslogan “Bebi con xacíu. Ye la nuesa cultura. Ye la to responsabilidá” tará presente en tol eventu, remembrando de pasu que la cultura asturiana de la sidre nun ye una cultura de “borrachera”, sinon de rellaciones sociales.
Espaciu Cardioprotexíu. Esti añu cuntaremos col equipamientu precisu (desfibrilaor) p’atender de manera eficaz una parada cardiaca fasta la llegada de los servicios mélicos d’emerxencia. Con estamidía adelantámosmos a les dimposiciones esistentes pa esta triba d’eventos a nivel eurropéu, y aportamos una seguranza a tolos nuesos visitantes.
Mapa de chigres de Xixón. l’oxetivu de la PSLA ye esparder y dar puxu a la cultura sidrera asturiana, y parte fundamental d’ella son los chigres, polo qu’esti mapa de chigres de Xixón ye una ferramienta indispensable. Anque tenemos incondicionales que nun salen de la Primer Sidre L’Añu nos cuatro díis que dura l’eventu, lo normal ye que la xente dedique esos díis a otres actividaes complementaries, y pa ello, pa que puedan siguir conociendo y esfrutanto de la cultura sidrera asturiana, a la entrada de la PSLA repartiráse un mapa onde figuren los chigres de Xixón. Pa que se sepia a ónde puen dirixise cuando tean fuera de la Primer Sidre L’Añu.
Lo mesmo que l’añu pasáu, nesta edición habrá una fastera acutada especialmente pa mascotes y rializaráse una collaboración cola asociación ‘30 díis en bici’. Amestámosmos asina a la so reivindicación y por esta xida toles demás presones que lleven la so bicicleta’l domingu 1 d’abril, podrán aceder igualmente gratis esi mesmu domingu.
