La recreación de la cultura sidrera vasca mimetiza ca vegada más a l’asturiana, llegando a esportala internacionalmente como propia. Atentos a la UNESCO!!
Los medios de comunicación asturianos avecen a engazar el panorama sidreru asturianu faciendo comparances ente la sidre vasco y asturiano, les más de les vegaes tapeciendo la diferencia fundamental qu’hai ente elles: la esistencia d’un gobiernu vascu que defende lo suyo, y d’un “Principado” que quier faer d’Asturies un barriu de Madrid y pa ello estórba-y tolo asturiano.
Por embargu, hai un aspeutu fundamental nel que nun suelen entrar, y ye’l tremendu mimetismu vascu nel tarrén de la sidre, frutu de la perda de los sos ellementos tradicionales y la reinvención d’un padrimoniu cultural sidreru basándose nel asturianu, y que lleguen a suplantar con total descaru y a esparder como si fuere vascu y non solo una copia.
El cartelu qu’acompanga al artículu ye la meyor espresión de dichu mimetismu y suplantación. El Txotx al que se fai mención ye una réplica de la espicha asturiana inventáu nos años 60, lo mesmo que’l vasu de sidre, la forma de beber la sidre d’un tragu, o l’echar la sidre (que llevare l’Asociación de Festexos de San Pedro –Llangréu- nos años 60 faciendo esibiciones d’echar sidre per Donostia), arriendes d’ello, el tonel qu’apaez ta acanteláu enriba pegollos, ello ye, a l’asturiana… que ye la forma agora mesmo esistente n’Euskal Herria por mor de que los llagareros vascos mercaron llagares asturianos enteros pa poner na so tierra.
Ello asina, los ellementos padrimoniales de la cultura asturiana de la sidre non solo tan siendo imitaos polos vascos, sinon que los esporten internacionalmente como si foren propios… pero la responsabilidá cabera nun ye d’ellos, sinon d’un “Principado” enemigu de tolo asturiano.
Nun hai qu’escaecer que pesia les reiteraes anuncies del “Principado” de que diba presentase la cultura asturiana de la sidre pa que fuere proclamada como Padrimoniu Inmaterial de la Humanidá pola UNESCO, a díi de güei entá nin la presentaron, cuando otres espresiones culturales qu’entamaron el procesu al empar, yá consiguieron esa declaración internacional (Les falles de Valencia). Sollertes a ver si tovía van ser los vascos los que presenten la candidatura na UNESCO, ¡Y con ellementos padrimoniales asturianos!
