Trátase del concursu de sidre casero de más sonadía y con mayor participación d’Asturies
LA SIDRA.- 68 llagareros participaron nel XVI Concursu de Sidre Casero de Villaviciosa, una cifra perimportante si camentamos que l’añu pasáu foi de vecería, y que munchos de los 330 llagares censaos nel conceyu Villaviciosa, mayen ca medios años –ello ye, mayen los años nos qu’hai bona collecha.
Como pue maxinase, el llabor del xuráu pa estremar ente tanta y tan bona sidre nun ye precisamente cenciellu. De fechu féxose en dos xornaes, na primera esbilláronse les que se consideraren les 12 meyores, y na segunda procedióse yá a la clasificación definitiva, na que trunfó Miguel Ángel Pontón, seguíu de Fermín Sánchez (Les Maseres, Bedriñana) y de Francisco Arenas (Llavares, Amandi), a quien-yos correspuenderá esta seronda representar a Villaviciosa nel campionatu d’Asturies que se cellebrará tamién nel conceyu Maliayu.
El restu clasificaos fueron Tomasita Fernández, de La Riera (Pión)Samuel González (Camoca), Isidoro Granja (Samartín de Vallea), Juan Pérez (Valdebárcena), Adrián Berros (Valdebárcena), Javier Pedrayes (La Madalena), Gilberto Alonso (Miravalles), Javier Ovide (Amandi) y Pablo Cueto (Cazanes).
Del concursu, Oscar Flórez, de l’Asociación de Fomentu de la Sidre Tradicional, destacó la participación, la calidá del productu y sobro manera’l comu va produciéndose un relevu xeneracional cola incorporación de ca vegada mayor xente mozo que continúa la tradición familiar ellaborando sidre pa en casa.
Per otru llau, esti concursu supón tou un referente pa los amantes de la sidre en xeneral, porque nel mesmu tiense opción a prebar la sidre presentao al concursu, ya inclusu tratar direutamente colos propios ellaboraores. Un auténticu lluxu que fexo que l’asistencia al eventu na plaza El Güevu fuere masivu.
