El conceyu d’Antey-Saint-André, na fastera italiana de los Alpes, acueye un añu más les dos cites más importantes de la sidra d’Italia, la fiesta de Mele Vallée y los alcuentros de Sicera. Esta vuelta sedrá pa la fin de selmana del 13 y 14 d’ochobre y, amás de la presencia de la propia Italia, tamién ta prevista la presencia de llagares d’Asturies, Bretaña, Austria y Polonia.
LA SIDRA.- Los díes 13 y 14 d’ochobre torna a cellebrase la Mele Vallée, la fiesta de la seronda d’Antey-Saint-André, el pueblu alpín que demientres esa fin de selmana conviértese na capital de la mazana y la sidra italiano, con una bayura d’actividaes venceyaes toes elles a la mazana reineta, la mazana pola qu’Antey-Saint-André ye afamáu en toa Italia.
Ente eses actividaes ta’l mercáu de productos tradicionales del domingu, pero tamién, les esposiciones, conferencies y alderiques na Casa la Cultura; y arriendes d’ello, y coincidiendo cola fiesta, tamién se cellebren les actividaes de Sicera, con tasties y mercáu de sidra nel centru’l pueblu.
