Nel díi d’ayeri anuncióse la incorpoación d’una docena de nuevos miembros a Sidreturismu Asturies.
El Clú de Productu Sidreturismu Asturies yá cunta con doce empreses y entidaes más, tres la rialización del actu de presentación oficial y entrega de distintivos a los nuevos miembros. Esta familia sidrera medra y failo gracies a: Conceyu de Xixón, llagar de sidra Viuda de Angelón (Nava), Viveru de Pedro Nieda (Villaviciosa), sidreríes: Parrilla Muñó Poniente y Parrilla Muñó Coto (dambes de Xixón) y Prida (Nava), empresa Los Caserinos (Villaviciosa), agospiamientos: Apartantiguo San Isidoro (Uviéu), La Casona de Amaido (San Tiso d’Abres) y La Llosuca (Villaviciosa), guía turística Elena Borchers (TourAsturies, Uviéu) y empresa de guíes turísticos Vantur (Xixón). Toos tienen de mancomún l’apueste por fomentar y dar a conocer tanto la mazana como la sidre asturiano y tolo que se engloba al so alrodiu, una oportunidá que ven facedera al formar parte de Sidreturismu Asturies.
Otru de los puntos rellevantes foi la mención a la primer entidá collaboradora d’esti Clú de Productu, que foi l’Asociación d’Echaores Sidre d’Asturies, una asociación que yá escomenzó a trabayar nel proyeutu al traviés de distintes actividaes con dellos miembros acoyíos, poniendo en valor l’actu del echar sidre, esta forma peculiar y singular asturiana de sirvir la nuesa sidrae ye considerada tou un emblema lo que consideramos vital dalo a conocer a tou turista que visite dalgún de los nuesos establecimientos.
Los anfitriones de la xornada y socios de l’Asociación Clú de Productu Sidreturismu Asturies, Graciela Blanco, viceconseyera de Turismu Asturies, Víctor Ramos, presidente del Conseyu Regulador DOP Sidra de Asturies, Ana Soberón, vicepresidenta del Clúster de Turismu Rural de Asturies y Javier Nievas, Representante de Caxa Rural de Asturies, estimaron l’adhesión y apueste por esti proyectu a los nuevos miembros, gracies a los cualos llégase a la cifra de 60 empreses y entidaes xuntaes, amás del apueste por collaboraciones con entes y/o empreses que pueden participar nel proyectu al traviés d’otres fórmules, como foi’l casu de l’Asociación d’Echaores Sidre d’Asturies. Tamién se fixo fincapié na intención de xorrecer pasu ente pasu pero con criteriu, apostando poles sinerxes que van surdiendo ente’l seutor sidreru y el de turismu del nuesu país, pa poder llograr un productu turísticu diferenciador alrodiu a un recursu auténticu, de calidá y con tantu raigañu como ye la Sidre de Asturies y la cultura sidrera asturiana.
