L’amuesa foi entamada pola Asociación de Sidre Casero de Piloña pa “recordar y caltener la tradición”.
LA SIDRA.- La pasada fin de selmana rIalizóse nel Mercáu de Coya una esibición p’amosar cómo se fai la sidre en casa. Pa ello, l’Asociación de Sidre Casero llevó un llagarín y deprendió a los más piqueños de la casa los estremaos pasos pa ellaborar la nuesa emblemática bébora. Esta actividá tuvo como oxetivu primordial recordar y caltener la tradición de facer esti productu en casa. Amás tamién hubo un amagüestu de castañes amagostaes en tambor.
La iniciativa tuvo enartada dientru’l Gran Amagüestu de Fin de Temporada entamáu pol Mercáu Llocal El Tenderete y tamién pola asociación Roblón de Coya. Ye la quinta vegada que se lleva a cabu, y nesta edición participaron un total de 35 puestos d’artesanía y entamáronse, amás de la mayada y l’amagüestu; conciertos musicales, amueses de fisioterapia y de semeya hestórica, vienta de productos gastronómicos y un bookcrosing –práutica que consiste en dexar llibros en llugares públicos por qu’otros los topen y llean–.
De magar les 11 de la mañana y fasta les 19:00 hores una gran cantidá de neños de distintes edaes participaron na mayada. El duernu, los mayos y el llagarín, fueron les principales atraciones de la xornada. Amás, l’Asociación de Sidre Casero repartió información sobro les I Xornaes de Sidre Tradicional Asturiana que se van llevar a cabu’l 11 y 12 de payares y cuya información yá s’espublizó nesti espaciu online en http://www.lasidre.as/as/noticies-as/11062-i-xornaes-de-sidre-tradicional-asturiana.
