Tendrá llugar esti sábadu 17 febreru a les 20:00 h. na Sidrería La Galana, Xixón.
LA SIDRA.- El sábadu 17 de febreru a les 20:00 h llevaráse a cabu na Sidrería La Galana de Xixón (Plaza Mayor, 10); la entrega premios del XI Concursu Semeyes LA SIDRA.
El pasáu 30 xineru tuvo llugar el fallu del certame na sede de la Fundación Asturies XXI y la revista LA SIDRA. El concursu cunta col padrociniu del Llagar JR y la collaboración de l’Asociación Fotográfica Asemeyando y de la citada sidrería.
Javier Álvarez Pastrana cola so obra “Escanciando” féxose col primer premiu dotáu con 700 € y medalla d’oru de la CEF.
José Miguel Romero Barco ganó’l primer accésit “Sagarra 4”. Esta reconocencia ta dotada con 250 € y medalla plata de la CEF.
El segundu accésit –150 € y medalla bronce de la CEF– foi pa José Agustín Gurruchaga pola so istantánia “Hoy toca manzana”.
Finalmente, la mención especial JR dotada con dos caxes de sidre del mencionáu llagar, foi para Nuria Campos con “Escanciao”.
Esti concursu cunta cola reconocencia de la Confederación Española de Fotografía –CEF– y de la Federación Asturiana d’Asociaciones Fotográfiques –FAAF–. Esti añu presentáronse un total de 171 semeyes de 52 autores. La votación y fallu foron abiertos al públicu que quinxo averase fasta les istalaciaones de la revista, talo y como s’anunció nes redes sociales, na páxina ueb de LA SIDRA y na edición impresa.
El xuráu tuvo compuestu por José Pañeda y Alberto Otero, dambos fotógrafos; Aurora Vigil-Escalera, direutora de la galería d’arte del mesmu nome; Pedro Gutiérrez, vicepresidente de la FAAF y presidente del Grupo Zona 5 de Xixón. El presidente del tribunal foi Luis J. Vigil-Escalera Quintanal, presidente de la FAAF y de Asemeyando Asociación fotográfica.
