El Serida aconseya emplegar forgaxes de maera nel procesu d’envieyamientu pa meyorar resultaos.
LA SIDRA.- Na ellaboración de los espirituosos como l’auguardiente de sidre, l’envieyamientu en contautu con maera costitúi una fase fundamental pa la calidá del productu final. Demientres esta etapa prodúcense sensibles cambios nel destiláu que contribúin a una meyora de les sos propiedaes organoléptiques.
L’envieyamientu tradicional faise en toneles non superiores a 600 llitros, davezu d’unos 250, lo qu’obliga a una importante inversión tantu na merca como nel caltenimientu y reposición de los mesmos, obligando a una prolongada inmovilización del productu y per ende un importante xorrecimientu de los costos.
Ello asina, dende’l Serida planteguen la posibilidá d’incorporar la maera direutamente nel sen de la bébora n’estremaos formatos: forgaxes, daos, duelles…etc., considerando la posibilidá d’un aporte esternu d’osixenu pa favorecer les osidaciones que se producen demientres l’aneyamientu.
L’estudiu ta firmáu por cuatro investigaores: Roberto Rodríguez Madrera y Belén Suárez Valles, dambos del aria de Teunología de los Alimentos, y Francisco Fuente-Maqueda e Isabel Feito Díaz, del area de Cultivos Hortofrutícoles y Forestales, que planteguen la reutilización de los residuos que dexen les empreses madereres tresformaores con esta fin. L’estudiu hedónicu (el que valora la percepción de los consumidores) nel que participaren 37 cosumidores en tasties guiaes pol Serida valoraron de forma mui asemeyao l’auguardiente aneyao de forma tradicional y el fechu con forgaxes, con malpenes tres décimes de diferencia de la nota de los productos en función del métodu d’ellaboración.
N’Asturies, y mentes el “Principado” nun los sustituya por pinos y ocalitos, hai más de 145.000 hectáries de superficie de castañal, lo que facilita la propuesta d’esti estudiu del Serida.
