Abiertu’l plazu pa inscribise nel concursu de la meyor sidre natural asturiana, la XXIX edición de la Fiesta de la Sidre Natural cellebraráse del 21 al 30 d’agostu
LA SIDRA.- La XXIX Fiesta de la Sidre Natural de Xixón va cellebrase del 21 al 30 d’agostu de 2020. Por cuenta de les restricciones derivaes de la COVID19 nesta 29 edición nun se van entamar el Récord Mundial d’Echáu Simultáneu de Sidre, nin los Cancios na Plaza Mayor, nin tampoco la tradicional xornada de degustación.
Seya que non, sí caltienen delles actividaes d’interés como’l Mercaín de la Sidre y la Mazana, les charres, el Concursu d’Echaores y el Premiu del Eloxu d’Oru pa la meyor Sidra Natural asturiana. Coles mesmes, mientres la Fiesta, Divertia va dar puxu al consumu de sidre natural asturiana nos llocales d’hostelería de la ciudá, lliderando una campaña de promoción del productu.
Los llagares que deseyen participar nel Premiu Eloxu d’Oru yá puen inscribise nel departamentu de Festexos. La seleición de la meyor sidrw cellebraráse nel Xardín Botánicu Atlánticu y va ser xulgada por 10 espertos propuestos polos llagares y los entamaores. La decisión final va tomase’l 30 d’agostu, por cinco tastiadores ente les 8 sidres finalistes, tres una esbilla previa de toles sidres presentaes a concursu que se va cellebrar el 27 d’agostu.
Al igual que n’ediciones anteriores, el públicu va poder alquirir los tradicionales vasos de la Fiesta nel Mercaín de la Sidre y la Mazana, que se va cellebrar dende’l 22 d’agostu y fasta el díi 30, na Plaza Mayor y contorna. El cartelu d’esta XXIX edición de la Fiesta, asina como la imaxe del vasu, son obra de la diseñaora gráfica xixonesa Noelia Pañeda.
