Sidra de Hielo Cortina algamó la puntuación más alto del concursu alemán na so categoría, pela so parte El Gaitero algamó 4 medalles.
LA SIDRA.- La Sidra de Hielo del llagar Cortina, Villaviciosa, algamó la medalla d’oru nel CiderWorld Award 2019, concursu enartáu cientru la feria internacional Cider World, que se cellebró a finales de marzu. Esti eventu aconceya ca añu, en Frankfurt, Alemaña, a dellos de los meyores ellaboraores de sidre a nivel mundial, siendo tou un referente nel seutor sidreru tantu a nivel européu como internacional. Esti añu competía sidre proviniente de países como Italia, Noruega, Chequia, Francia, Irlanda, Suiza, Asturies o los Estaos Xuníos.
La Sidra de Hielo Cortina, non solo ganó la medalla d’oru na so categoría, sinon qu’algamó los 118 puntos de los 120 másimos del xuráu, formáu por más de 30 espertos del seutor, podía otorgar a los participantes. D’esta miente, ye cabezalera nel ránkig internacional compuestu poles más de 100 sidres que foron gallardonaes nel CiderWorld Award´19, una gran noticia non solo pal llagar de Cortina sinon pa tol seutor sidreru asturianu. Amás la sidre natural ecolóxico d’esti llagar tamién consiguió otra medalla d’oru.
“Les races de mazana asturianes, el clima y el tarrén d’esta rexón, son amás d’una seña d’identidá, un fautor de calidá estraordinario que mos permite algamar como resultáu unes sidres con grandes aptitúes, estremaes, úniques. Por ello’l fechu de que la nuesa Sidra de Hielo figure yá ente les meyores sidres de xelu del mundiu, augura un gran futuru pa esti productu, tanto n’Asturies como nel panorama internacional” aseguró Sidra Cortina.
Pela so parte, la sidre del Grupo El Gaitero algamaron 4 medalles nesti mesmu certame. El Gaitero Natural y El Tercio El Gaitero algamaron dos medalles d’honor, mentes que Pomarina Natural Espumosa y El Gaitero Red Grape alzárense con dos medalles de plata. “Estes reconocencies tornen a confirmar una vuelta más el bon facer d’esta empresa que lleva cuasique 130 años no más alto del seutor” siñalaron dende’l llagar.
