L’alcaldesa de Mondoñedo, Elena Candia; la conseyera y es alcaldesa d’Avilés, Pilar Varela; y Eufrasio Sánchez, críticu del yantar, foron los gallardonaos nesta edición.
LA SIDRA.- Nueva cita de los Gastrónomos del Yumay que’l pasáu llunes 22 de febreru cellebraron la entrega de premios Comensal d’Honra Álvaro Cunqueiro”. Nesta edición, los gallardonaos foron: L’alcaldesa de Mondoñedo, Elena Candia; la conseyera y es alcaldesa d’Avilés, Pilar Varela y l’escritor y críticu gastronómicu de Yantar, Eufrasio Sánchez. Enantes de la entrega premios, los gastrónomos del Yumay entamaron una visita al cascu antiguu d’Avilés pela zona del camín de Santiago, que corrió al cargu de la caderalga de la Universidá d’Uviéu y cronista oficial d’Avilés, Josefa Sanz.
El grupu tuvo costituyíu pola yá citada Elena Candia; Julio Castrillón, presidente de los Gastrónomos del Yumay, Carlos Guardado tamién d’esta mesma confradería, Rafael Sánchez Barliega, xerente del Xacobeo Xunta de Galicia; Laureano García, presidente d’Asociaciones Camín de Santiago Norte d’España; José María Cleru, presidente de l’asociación ástur-galaica Santiago Apostol d’Avilés; ente otros. Darréu, la corporación visitó’l monolitu cola firma d’Álvaro Cunqueiro, premiu HDL colesterol bonu en 2002 asitiáu na Ría d’Avilés.
Haza les los dos y cuartu de la tardi, los asistentes al eventu axuntaron nel Yumay pa empecipiar la clausura de premios bebiéndo, namás llegar, unos culinos de sidre. Presidiendo’l chigre atopábase l’afamada pulpeira Aurora Baranda, que recibió a premiaos y miembros de la confradería tresnando pulpu á feira. Y ye que la entrega de premios foi’l broche d’oru pal certame d’esti platu tradicional que llevó a cabu’l Yumay del 17 al 22 de febreru. Amás, representantes de la mayor parte de les confraderíes gastronómiques del país nun faltaron a la cita, como por casu la del oriciu de Xixón, o la de los siceratores d’Asturies. Y ye que los Gastrónomos del Yumay son un claru referente nel universu gastronómicu asturianu. Un fechu que quedó llargamente demostráu demientres la xinta n’honor a los premiaos.
