El Conseyu Regulador de la DOP Sidre d’Asturies y La Cátedra de la Sidre d’Asturies presentaron un llibru infantil dedicáu a la Cultura Sidrera Asturiana
LA SIDRA.- Esti xueves pasáu presentóse, na see del Conseyu Regulador de la DOP Sidre d’Asturies, el llibru ‘La Sidre d’Asturies, una bébora bien nuesa’. Con testos de David Acera ya illustraciones de Raquel Lagartos atópase empobináu al públicu infantil coles mires d’empecipialos na conocencia de la Cultura Sidrera Asturiana, candidata a Padremuñu Inmaterial de la Humanidá énte la UNESCO. Na obra detállense los métodos de produición y ellaboración, les tradiciones llúdiques y festives, el calter sostenible del seutor y la manera en que los neños participen del nuesu elementu más identitario.
“Esti llibru ye un viaxe nel tiempu. Los cuentos sirven pa coneutar col pasáu, cola cultura sidrera asturiana que sigue bien viva y que tien de tresmitise de xeneración en xeneración”, manifestó l’autor del cuentu, David Acera.
“La función del Conseyu Regulador de la DOP Sidre d’Asturies ye promocionar y defender la Sidre d’Asturies, que ye l’orixe de la cultura sidrera asturiana. Caltener esta cultura nos neños ye necesario por que se familiaricen coles nueses tradiciones y caltengan esti patrimoniu”, espresó’l presidente del Conseyu Regulador de la DOP Sidre d’Asturies, Guillermo Guisasola.
“Esta espublización de la Cátedra de la Sidre d’Asturies atópase empobinada al públicu infantil coles mires d’empecipialos na conocencia de la cultura sidrera asturiana, candidata española a ser reconocida como Patrimoniu Cultural Inmaterial de la UNESCO, llueu”, amestó Luis Benitu, director de la Cátedra de la Sidre d’Asturies de la Universidá d’Uviéu.
Esta espublización en dixital va xubir a les páxines web de dambos organismos y va distribuyise físicamente a tolos colexos nel primer nivel de primaria 6-10 años. Tamién s’editó una versión n’español.
