Del 19 al 27 d’agostu la ciudá enllenarásse d’actividaes cuyu portagonista ye la nuesa bébora emblemático.
LA SIDRA.- Yá ta too tresnao pa una de les fiestes más sidreres d’Asturies. La Fiesta de la Sidre de Xixón levaráse a cabu de magar mañana y fasta’l 27 d’agostu con un gran abanicu d’actividaes que tienen como protagonista a la nuesa bébora emblemático.
Nos Xardinos de la Reina de 17:00 a 24:00 hores podremos atopar toos estos díis el Mercaín de la Sidre y La Mazana con más de venti artesanos qu’espondrán les sos obres asina como productos gastronómicos. D’igual miente, n’estremaos puntos de la ciudá -Plaza’l Marqués, Plaza d’Italia, Paséu de Begoña y Campu Valdés- llevaránse a cabu actividaes culturales nel espaciu denomináu como “Arte na Cai” talos como talleres de folclor por parte de l’Asociación Azabache, Trebeyu o El Xolgoriu, música y baille tradicional Excélsior, coros y dances del Rial Grupu de Cultura Covadonga o música clásico de la man de Radio Kras Krasklásica.
Tamién habrá un fotomatón nel llamáu “El puestín de la folixa” n’onde al mercar dos vasos comemorativos, daráse una semeya de recuerdu. Amás, nesi mesmu “puestín”podremos esperimentar una “visita virtual ” a un llagar entamáu pol CD ROP Sidre d’Asturies los díis 24 y 25 n’horariu de 12:00 a 14:00 y de 18:00 a 21:00 hores. Lo mesmo qu’otros años fadráse una masterclass de preba y echáu de sidre’l martes 22 nel Campu Valdés a les ocho la tardi, y una charra sobro’l consumu responsable de sidre por parte del Conseyu de la Mocedá de Xixón el 23 a les siete nel llugar enantes mencionáu.El xueves 24 na Plaza Mayor, tendrá llugar el XXVI Concursu Oficial d’Echaores a les cinco la tardi, cola entrega tamién del premiu a la “Etiqueta Más Guapina” por parte del grupu de colleicionismu Sidrastur.
El vienres 25 intentaráse bater el récor mundial d’echáu al empar na Playa de Castrillón. Escomenzará haza les seyes de la tardi y a les 20:30 toos xuntos echaremos un culete al empar pa consiguilo. Los entamaores cuntarán con 8,565 botelles pa intentar superar el récord del 2015, yá que l’añu pasáu nun lo algamemos. ¡Toos a participar! Y nun hai qu’escaecer el bus de la sidre con visites demientres los díis de la fiesta a los llagares e Castañón, Menéndez, Peñón y Trabanco.
El sábadu rializaránse los tradicionales “Cancios de chigre” na Plaza Mayor a les 21:00 hores cola actuación de la Sociedá Torner y les voces de tol públicu asistente. Y el domingu na mesma Plaza Mayor y la Plaza’l Marqués otorgaránse’l Premiu del Públicu y el “Eloxu d’Oru” -premiu del xuráu especializáu- de la sidre presentao al concursu. Ellí mesmo daráse’l “Tonel d’Oru” al llagareru Cesar Agüera Toyos de Sidre Cabueñes.
Tola información pue atopase na páxina ueb del Ayuntamientu Xixón: http://www.gijon.info/
