Ayeri díi 11 d´ochobre tuvo llugar dientru´l Festival Intercélticu d´An Oriant una de les actuaciones más fuertes de la so programación, tantu pal públicu asturianu comu pal internacional.
Poques vegaes tien ún la oportunidá de ver nun mesmu escenariu de siguío a artistes asturianos del calibre de Hevia y Llan de Cubel y el públicu sepio aprecialo col so bultable entusiasmu.
L´archiconocíu gaiteru José Ángel Hevia Velasco xuntu cola so hermana Mª José Hevia xuntu col restu la formación musical dieron la nota nel L´Amphi de la capital bretona de Lorient nun conciertu tan esperáu comu vistosu. Na actuación nun solo amosaron los sos grandes ésitos sinon qu´amás dedicaron un d´ellos al anterior muerganizaor d´esti Festival Intercélticu, Lisardo Lombardía, a quien toos debemos dar les gracies por tantos años de tan bon llabor y poro recibió un aplausu atronaor que nun llega a pagar too lo qu´Asturies y el mundiu folk en xeneral y debe a esti home. En cualisquier casu lo meyor de l´actuación foi la combinación de los hermanos Hevia xuntu cola Banda Gaites Llacín nun espectáculu de lluces, soníu, públicu en pie y batiendo palmes que respinguen. Y nun ye una espresión, respinguen a ún.
Tres la vibrante actuación d´Hevia na que´l públicu nun pudo evitar salir a baillar el xiringuelu de Naves toco y el turnu al grupu Llan de Cubel, retornando a los escenarios tres la tráxica ausencia del so músicu y compañeru Elías García.
Un conciertu emotivu al empar qu´alegre y baillable nel que´l nuevu discu tuvo un pesu especial sin dexar d´asoleyar los sos grandes ésitos comu´l cantar del ayerán que perdió la guerra o Llonxana. Ritmos tradicionales colos sos maxistrales arreglos, ritmos vertixinosos de vigulín y melodíes que fuercien a baillar fasta´l más torpe. Nun hai otra manera de describilo.
De Llan de Cubel falaremos más seliquino y con tiempu na prósima edición de LA SIDRA na qu´apaecerá una entrevista colos sos miembros.
