La demostración práutica del serviciu de la sidre -echáu- na Feria Internacional de Turismo llevanta protestes ente los participantes nel Campeonatu d’Echaores.
La presentación de la candidatura de la cultura asturiana de la sidre na UNESCO rializada na 42º edición de la Feria Internacional de Turismo (Fitur), que se cellebra n’Ifema Madrid, escomenzó con una interesante mesa reonda a la qu’asistieron el Direutor Xeneral de Cultura y Padremoñu, Pablo León, el Direutor de la Cátedra de la Sidra de la Universidá d’Uviéu, Luis Benito García; el Presidente de la Denominación d’Orixen Protexía (DOP) Sidra d’Asturies, Guillermo Guisasola; Ana Soberón, representante del Clú de Productu Sidraturismu, y Saúl Moro, presidente de la Asociación d’Echaores, en nome de la patronal Otea.
Por embargu, el problema surdió cuando se fexo una demostración práutica del serviciu de la sidre, cuya execución a cargu de la presona contratada pol “Principado” dexó muncho que desear, de tala miente que’l propiu Saúl Moro decidió llevantase’n mediu la presentación y ufrir una demostración práutica de comu s’echa la sidre correchamente, faciendo patente la desemeyanza.
La situación xeneró la indignación de los participantes del Campeonatu d’Echaores que davezu son los encargaos de representar la sidre n’actos oficiales -por daqué son los meyores d’Asturies, y per ende, del mundiu- qu’aniciaron una campaña en redes denunciando’l casu, qu’entienden non solo desmerez a la propia candidatura de la cultura asturiana de la sidre énte la Unesco, sinon tamién el llabor de los echaores en xeneral, polo que piden que nun tornen a dase situaciones como la comentada y que se recurra a echaores profesionales “qu’ensalcen la nuesa bebida de referencia y abanderen la cultura sidrera asturiana”.
