Tres l’incendiu nes sos instalaciones recibe toa triba d’amueses de sofitu y solidaridá del mundiu la sidre.
LA SIDRA.- L’incendiu asocedió na mañana del díi d’ayeri, y afeutó a la llanta corchaora de Sidra Viudo de Angelón, lo que supunxo la destrucción de 4.987 caxes de sidre con tol so conteníu (poco menos de 60.000 botelles), asina comu otres 1.800 caxes vacíes, lo que complica’l caltenimientu de la produición del llagar, que per otra parte, va tener qu’enfrentase a la recostruición de tola planta.
Según espresó’l llagareru Fran Ordóñez nestos momentos nun tienen maquinaria pa corchar, lo que supon un problema bien grave, magar cunten con daqué de sidre n’otra nave, colo que van poder completar pidíos, pero a día de güei nun tien nidio como van faer pa siguir corchando.
Percima la desgracia, hai destacar l’ensame d’amueses de solidaridá que dichu llagar vien recibiendo, de forma presonal y al traviés de les redes sociales, incluyíes ufiertes d’otros llagares p’aidar nos llabores de corcháu, y “no que faiga falta”.
El Llagar Viuda de Angelón non solo ye bien queríu y reconocíu nel mundiu la sidre y a nivel empresarial, sinón en toa Asturies, habida cuenta del so compromisu cola cultura asturiana y la so conocida dimposición a collaborar con actividaes solidaries.
