Güei llévase a cabu’l ‘sidrafórum’ dientru les actividaes del Festival de la Sidre de Nava
LA SIDRA.- A les 19:30 hores va llevase a cabu’l llamáu ‘sidrafórum’ un espaciu nel qu’a lo llargo de los años aldericáronse distintes temes rellacionaes cola bébora identitaria d’Asturies. Esti añu va tratar sobro “les otres sidres, la so tastia y potencial de futuru”.
Nesti sen, un de los llagares navetos que diversificó productos ye’l de Viuda de Angelón. Ufierta un gran abanicu de productos. Dende sidre natural, poques gracies, fasta de xelu, brut, crema de mazana, etc. “Nós, dempués de más de 72 años que llevamos nel llagar, quinxímos faer xorrecer la cultura sidrera y ufiertar amás de productos clásicos’ como la sidre natural, productos nuevos pa públicos estremaos. Entós, partiendo de la sidre natural asturiana, intentamos ellaborar otres sidres que puedan encaxar en mercaos fuera’l país. N’Inglaterra gústa-yos la sidre con un pocu d’amargos, n’Estaos Xuníos un pocu más aceda y dulce. Ca territoriu ye distintu tocántenes a consumu” desplicó pa esti mediu l’ellaborador del citáu llagar Fran Ordóñez.
Pa elli, los asturianos tenemos “la gran fortuna” de cuntar cola sidra tradicional: “Dempués de viaxar per dellos países y conocer la sidre d’ellí; la nuesa sidre natural ye la meyor del mundiu. Non porque yo seya asturianu y lo crea, la xente de fora ye la que lo diz. Llagareros estranxeros afirmen que nós tenemos un parque frutal de races de mazana de sidra enorme, que nun lu tien nengún sitiu. Aparte, la nuesa sidra ta lleldada por lleldos selvaxes, ye una formientaura bonal, que nenyures faise asina. Y dempués, equí la mazana recuéyese a man. Eso ye daqué a lo que nós nun-y damos valor, pero fora, queden sosprendíos”.
Una entrevista más amplia a esti llagarero va poder lleese na siguiente edición de la revista, xuntu con un ampliu reportaxe del XLII Festival de la Sidre de Nava.
