Dempués d’un rocambolescu procesu, esti eventu, declaráu d’Interés Social pol mesmu Conceyu de Xixón, acaba siendo movida al otru estremu de la ciudá
L’Auditoriu Doctor Francisco Cienfuegos-Xovellanos, en L’Atalaya de Cimavilla, va acoyer la catorce edición de la Primera Sidre L’Añu, tres un llargu procesu pocu claru y un tantu arbitrariu.
LA SIDRA.- La Primer Sidre L’Añu ye ún de los pocos eventos declaráu d’Interés Social pol Conceyu de Xixón, y lleva cellebrándose de forma esitosa nel Muséu del Pueblu d’Asturies dende’l so aniciu, ensin que se produxera denguna triba d’incidente destacable… Sicasí esti añu deniégase l’espaciu acoyéndose a una llei de 2015 –enxamás nun aplicada- que prohibe’l consumu d’alcol en centros públicos, ignorando la llexislación asturiana al respective de la sidre y que la cultura asturiana de la sidre foi declarada, yá en 2014, pol Principáu d’Asturies Bien d’Interés Cultural, lo qu’implica’l so respetu y promoción, amás de qu’esti añu espérase que seya reconocida como Padremuñu Inmaterial de la Humanidá pola UNESCO.
Esta aplicación arbitraria d’una llei estatal y non un pretendíu “dañu a los elementos patrimoniales del Muséu del Pueblu d’Asturies” –qu’enxamás nun se dió nos trece años de cellebración- ye la única causa que figura na denegación de dichu espaciu.
Por si eso fuera pocu, la solicitú del Parque Hermanos Castro como llugar alternativu tamién foi refugáu por un informe negativu de Divertia por “atopase en zona urbana densamente poblada, cercana a delles cortiles hoteleres, en temporada d’alta ocupación”. Hai que recordar que’l parque Hermanos Castro ye utilizáu dende va años con toa normalidá pa espectáculos multitudinarios, dende circos a festivales musicales, como por casu el Tsunami, con actuaciones musicales n’horarios nocherniegos, ensin qu’ello representara los problemes qu’agora s’aducen discriminatoriamente pa negar la cellebración de la XIV Primer Sidre L’Añu.
Por too ello, y como postrer opción posible, la XIV Primer Sidre L’Añu vese obligada a treslladase al Auditoriu Doctor Francisco Cienfuegos-Xovellanos, en L’Atalaya de Cimavilla, con gran perxuiciu pa l’eventu en sí –nun ye l’espaciu afayaízu, ya implica desorientar a un públicu fidelizado col Muséu del Pueblu d’Asturies como see-, y pa la mesma organización, que se ve obligada a faer un esfuerzu organizativu y económicu desproporcionáu y con bien pocu marxe de tiempu.
En tou casu, la Fundación Asturies XXI, entamaora del eventu, caltién la cellebración d’esta XIV Primer Sidre L’Añu y fai un llamamientu a los amantes de la sidre y de la cultura asturiana polo xeneral a qu’aíden a esparder la convocatoria, y bien especialmente’l cambiiu d’allugamientu, por que magar too esta seya una edición a lo menos tan esitosa como les anteriores.
PRIMER SIDRE L’AÑU
La Primer Sidre L’Añu ye l’eventu col que da empiezu la temporada sidrera asturiana, recoyendo la tradición d’abrir toneles y prebar la sidre nuevo cola llegada de la Selmana Santa. Asina, nelli vamos topar la nueva collecha de decenes de llagares, tanto escanciaos en barra como en toneles a llibre disposición de los asistentes, qu’entrarán al recintu previu pagu de namás diez euros por tola xornada –de 12:00 a 21:30-.
Amás de sidre, los asistentes podrán ver y practicar esportes y xuegos tradicionales, esfrutar de la música y balles del país, prebar variedaes de sidre y productos derivaos perpocu avezaos, facer sidre’l duernu, deprender a echar sidre, participar nos concursos y munches otres actividaes.
Básicamente trátase d’una espicha tradicional –la más grande del país- na que s’espresen los aspeutos fundamentales de la Cultura Asturiana de la Sidre, qu’empresta especial atención al públicu infantil, con toa una serie d’actividaes específiques demientres les cuatro xornaes de duración
