El preciu de la botella taraminga yá ente 2’90€ y 3’40€.
LA SIDRA.- Añu nuevu, preciu nuevu. Asina opinen dellos hosteleros que, col nuevu añu decidieren xubir el preciu de la botella sidre.
L’Asociación de Turismu y Hostelería d’Asturies (OTEA) defende la nueva xubida aludiendo a la llei d’ufierta y demanda. Pa ello ponen como exemplu la xubía d’otres bébores como’l café o’l vinu.
Anque a los asturianos lo que-yos duel ye’l preciu la sidre. Porque los llagares nun xubieron los precios y la collechona del añu pasáu nun paez xustificar l’aumentu.
Sicasí, los hosteleros reclamen que la sidre tien un preciu demasiadamente axustáu, siendo’l marxe de beneficiu muncho menor que n’otros productos, y que n’otros llugares como Madrid o País Vascu la botella sidre cuesta cuasique’l doblu.
Per otru llau, tamién se debería tener en cuenta cómo se sirve la sidre, yá que nel casu de los echaores profesionales ta más xustificáu que por aciu l’usu d’artiluxos como echaores llétricos o tapones.
N’otru aspeutu, lo que dende OTEA búscase ye dinificar un productu tan nuesu, tan únicu y valoralu como correspuende. Nesti sen nun paez escesivu pagar 2’90€ por una sidre normal y 3’40€ por una DOP Sidre d’Asturies.
