La VI degustación de Sidre Casero de Carreño, afita esti eventu como referencia obligao del panorama sidreru asturianu
LA SIDRA.- El poliesportivu de Perlora, nel Barriu la Pedrera, y entamada pola Asociación de Sidre Casero de Carreño, esta sesta degustación cuntó cola participación de 21 llagareros caseros, 20 del conceyu Carreño y ún de l’Asociación Sociocultural de Muñó, ASECEVI, que fo’l llagar invitáu d’esti añu.
Ventiún llagares y munchu amante de la sidre que nun quinxo perdese esta oportunidá única d’esfrutar d’estes sidres de calidá, auténtiques, con saborgos que nun suelen atopase na sidre más comercial, y que caltienen la sencia de la tradición sidrera asturiana.
Como davezu, mercando’l vasu comemorativu (5 €) dábase opción a prebar tola sidre presentao. Muncha sidre, y lo más d’ello de bono a perbono, muncho d’ello sidre aneyo. porque siendo’l pasáu añu de vecería hebio quien nun s’animó a mayar. Por si fuere poco l’asoción entamaora foi tan arrogante que convidaba tamién a pinchos –llacón, empanada, tortiella, bollinos preñaos..- pa cola sidre, qu’hai que forrar bien l’estomadu si queremos ser quien a prebar tola ufierta sidrera-.
Arriendes d’ello tamién pudo esfrutase de la V Esposición d’elementos funcionales de llagares antiguos, que cuntó con cinco pieces cedíes pal eventu per parte de llagareros de conceyu. Asina mesmo resultaron tou un ésitu los talleres d’ellaboración de sidre dulce y d’echar sidre pa neños y neñes.
Tamién llamó muncho l’atención la presencia de la empresa UriaXait, S.L., especializada en ciencia de datos, que va llevar a cabu un analís de sentimientos sobro la cultura de la sidre y la percepción de la sidra casero, y que punxo a los asistentes na difícil xera d’estremar ente semeyes de mazana de verdá y otres xeneraes por Intelixencia artificial.
Destacar per otru llau la entrega de la Mazana d’Oru al primer productor de sidre d’espolleta de Carreño, recuperando asina una tradición sidrera que nun suel reivindicase.
En resume, qu’hai qu’esperar un añu fasta la prósima degustación, y siendo esti un añu de collechona, de xuru qu’habrá sospreses.
