El multitudinariu alcuentru foi l’escenariu idóniu pa que turistes y residentes conozan a fondo la nuesa bébora tradicional.
El Festival del Arcu Atlánticu, que cellebra la mayor parte de les sos actividaes en Xixón, foi nesti branu ún de los escaparates más potentes pa que tanto turistes comu residentes puedan conocer más sobro la nuesa bébora tradicional. Exemplu d’ello foi la pasada fin de selmana, cuandu los conceyos integrantes de la Contorna de la Sidre, asistieron al alcuentru pa promocionar lo qu’ufierten los sos conceyos, cuantimás, la bébora asturiano por escelencia.
Fasta l’eventu averóse una delegación de dicha entidá compuesta por Saúl Bastián, alcalde de Sariegu; Juan Cañal, de Nava y presidente de la Fundación de la Sidre; Gerardo Fabián, de Cabranes; María Menéndez, conceyala de Cultura de Bimenes; Ana López, conceyala de Cultura de Villaviciosa; y Rogelio Pando, alcalde de Colunga y actual presidente de la Contorna de la Sidre.
Asina, el festival del Arcu Atlánticu, cumple col so cometíu de ser “un llugar pal alcuentru y l’intercambiu de creadores, artistes, colleutivos y asociaciones, entamadores y entidaes amestaes al seutor del comerciu y el turismu”. Un oxetivu que Pando entiende a la perfeición y que sabe enfocalo escontra la nuesa bébora patrio. “Asturies tocantenes a sidre ta a un gran nivel, pienso que ca añu va superándose. Yo allego a tolos certames, voi a toles presentaciones y crié nuna casa onde siempres se fexo sidre. Por tantu considero que la nuesa bébora tradicional tien un gran nivel y que fora de les nueses fronteres ta marcándose oxetivos pa la so crecedera. Pero la sidre asturiano va ser la meyor tea onde tea” afirmó Pando al ser nomáu parte de la confradería de los Gastrónomos del Yumay.
