Esta fin de selmana, nos díis 21 y 22 de setiembre la ciudá polaca de Lublin tórnase na capital europea de la sidre por mor del so festival sidreru
LA SIDRA.- Nesti eventu, que ya lleva 6 ediciones d’esistencia, axúntense 10 productores polacos, la mayoria de l’arIa de Lublin, onde hai más tradición sidrera y gran produición de mazana. L’eventu tien llugar na hestórica plaza’l tribunal del cascu vieyu de Lublin y a elli averaronse cientos de visitantes.
Aparte del públicu polacu los visitantes especiales foron los miembros de la dellegación asturiana de man de la Fundación Asturies XXI, quienes nun solo cuntaben con stand propiu sinón que yeren los únicos participantes de fuera Polonia. Sicasí Wioletta Wilcos y la muerganización l’eventu agasayaron a los miembros de LA SIDRA y la Fundación Asturies XXI, nos que recayó la responsabilidá la presidencia’l xuráu internacional de los premios a la meyor sidre y la espicha de la pipa sidre inaugural.
Nesti concursu participaren los meyores productores de sidre artesano del país, con 28 productos presentaos al concursu, con xuráu internacional y tastia a ciegues. Nesta xornada sosprendió gratamente tantu a asturianos comu polacos pol altu nivel de les sidres presentaes. Equí la tendencia ye a la sidre más artesanal qu’industrial, non filtrao y con daqué de gas amestao, con notes d’orixinalidá nos so arumes. El tastu de la sidre polaco tien una bultable semeyanza a la sidre asturiano, primando arumes frutales y saborgos ácedos.
Los ganaores foron:
- Primer premiu: Radek Ogar, de Cydr Radosny.
- Segundu premiu: Michał Oleksiński de Cydr Opoczka Przełom.
- Tercer premiu: Frux Solis Cydr Sadownika 2018
Demientres el sábadu los productores ufiertaron los sos sidres pa tastiar per vasos al públicu y comu nun podía ser d’otramiente la sidre asturiano taba presente nos formatos de sidre de mesa, axampanao y por supuestu natural, que rescampló pola nuesa espectacular tradición del echáu. Dempués cellebrose una cena colos productores y un conciertu p’amenizar la velada.
Esta collaboración astur-polaca afitarase la semana que vien cuandu una delegación de productores polacos venga a esfrutar la nuesa cultura sidrera nel Salón Internacional de les Sidres de Gala y sobro too a participar en los premios SISGA, qu’esti añu promete algamar cotes de calidá peraltes. D’esta mena entama una collaboración que pon a Xixón y a Lublin nel cientru’l mapa sidreru internacional.
(Visited 2.890.210 times)
