Una dellegación de LA SIDRA afáyase dende’l pasáu llunes n’Alimentaria, una de les principales feries europees de l’alimentación, que se cellebra en Barcelona.
LA SIDRA.- Col oxetu de conocer de primer man la evolución del mercáu agroalimentariu y les postreres tendencies, especialmente no que cinca al seutor de la sidre y vinculaos, asina comu pa facer un seguimientu de la presencia de la sidre nesti eventu, nel qu’hai años toviemos a puntu consiguir que la sidre toviere un pabellón diferenciáu, una dellegación de LA SIDRA afáyase nesti Salón en Barcelona.
Pela parte asturiano tenemos los llagares Trabanco y Riestra, nel estand del “Principado” , El Gaitero y Mayador con estans propios, y per bien asitiaos, de l’Asturies de Santillana, Somarroza nel Stand de Cantabria, y llueu, nel d’EH l’Asociación de Sidreríes Gipuzconaes, y nel de Navarra, EVA.
Arriendes d’ello, tamién se ta faciendo un importante llabor de comunicación, presentando la nuesa espublización, y los eventos sidreros qu’entamamos, especialmente’l SISGA,cuya proyeición pa munchos de los espositores equí presente ye bien bona. Arriendes d’ello, mañana xueves tendrá llugar la presentación del Salón Internacional de les Sidres de Gala (SISGA), na Cena Gala que se cellebrará nel Restorán Novohotel Barcelona City, y el Sábadu la I Folixa de la Sidre en Barcelona, que se cellebrará nes istalaciones del Cientru Asturianu de Barcelona.
Comu d’avezu, el tand del “Principado”, al fondu a la drecha, al llau de los servicios, onde nun pasa naide salvo que les necesidades fisiolóxiques lo requieran. El “Principado” humilla a los productores asturianos ellí presentes. El “Principado” humilla Asturies.
