Entamu
La cultura asturiana de la sidre protagonizó ensin dubia esti postrer mes, y ye que la so prósima – esperamos – declaración pola Unesco como Padremuñu Inmaterial de la Humanidá, provocó un apueste firme en FITUR, col oxetu tantu d’aidar a consiguila como d’empecipiar a rentabilizar turísticamente esta estraordinaria y merecía distinción.
Nesti enfotu por promocionar y rentabilizar la nuesa sidre y la cultura qu’asturianos y asturianes fuimos entetexendo al so alrodiu a lo llargo los tiempos, provocóse un ciertu discutiniu pola campaña rializada pol Conceyu d’Uviéu col eslogan de “Uviéu, capital de la sidre”, na que, como capital d’Asturies, tamién se postula como capital d’esti productu emblemáticu, lo que xeneró una importante polémica con otros conceyos asturianos especialmente venceyaos al seutor de la sidre. Concretamente Xixón y la Contorna de la Sidre, que consideren que nun tien de patrimonializáse asina esi productu, y que lo que toca ye xuncir fuerces nun oxetivu común.
Seya como fora, lo cierto ye que too ello ta xenerando una dinamización del mundiu la sidre asturiano, con potenciación y anunciu de nueves convocatories sidreres, como la prevista pa xunu nel yá míticu Bulevar de la sidre, que yá se presenta como “Festival Internacional de la Sidre”.
El sidreturismu tien n’ Asturies un potencial enorme qu’entá nun escomencemos a desendolcar, y si por fin llega a bon puertu la candidatura na Unesco, les espeutatives son entá meyores. Arriendes d’ello, los apuestes son ca vegada mayores. Conceyos, llagares, sidreríes… tán desendolcando iniciatives nesti sen, y el so efeutu va ser visible al curtiu plazu.
Per otra parte, tamién se presentaron los resultaos del 2021 de la DOP Sidre d’Asturies, y bamente hai motivos pa felicitalos y felicitase. Magar la difícil situación xenerada pol Covid-19 nestos dos postreros años, la Sidre d’Asturies sigue cumpliendo oxetivos y desendolcándose de forma satisfactorio. ¡Norabona!
Y a lo cabero, cuando la sidre yá ta dando los sos postreros pasos en tinos y toneles, el Concursu Semeyes LA SIDRA sigue atropando participantes, y la Primer Sidre L’Añu yá s’acollumbra pa esta selmana santa. Siguimos avanzando.
