Detalle del platu de David Díaz Fernández, Pitu cantábricu ‘poché’ con glaseáu de muselina d’oricios, que lleva vinagre sidre y qu’apaez nel recetariu
La rede de cooperación edita un recetariu, coordináu dende la Escuela d’Hostelería IES Valle d’Ayer, con recetes tradicionales ente les que s’inclúi la sidre y el so vinagre
LA SIDRA.- La Rede de Cooperación de Ciudaes na Ruta de la Plata editó una nueva guía, ‘Gastronomía en la Ruta Vía de la Plata’, na que recueye más d’una ventena de recetes de cocina ellaboraes con productos tradicionales de ca territoriu qu’integra l’históricu itinerariu. El llibru ellaboróse en collaboración con escueles d’hostelería y turismu de les cuatro comunidaes autónomes poles que traviesa esti percorríu: Andalucía, Estremadura, Castiella y Llión, y de xacíu, Asturies.
“Al traviés de más d’una ventena de petitoses propuestes, el llector va afayar deliciosos platos ellaboraos con productos llocales de la Ruta Vía de la Plata que van dende la cocina tradicional fasta la más creativa ya innovadora. Entrantes, guisos, platos de pexe y carne, y deliciosos postres configuren un recetariu col que satisfaer los paladares más desixentes” afirma la rede.
Salpicón de verdines con pixín allagostáu, Anques de xaronca a la bañezana, Perdiz con escabeche navidiegu, Papes de topeto en crema de bacalláu confitáu… son delles de les propuestes de les escueles d’hostelería de Sevilla, Plasencia, Llión, l’IES Valle d’Ayer y del CIFP de Xixón, que fixeron posible esti llibru, editáu a collor ya illustráu con semeyes de caún de los platos.
Hai que destacar qu’esti recetariu foi coordináu dende’l IES Valle d’Ayer ya inclúinse recetes con productos que tienen DOP o IXP de ca territoriu. Y llóxicamente, nel apartáu de Asturies, atopamos recetes con sidre o col so vinagre como’l yá citáu salpicón, pero tamién Pintu del cantábricu “poché” con glaseáu de muselina d’oricios, Mazana osmotizada con sidre de xelu, Tacu “San Cayetano canalla”, de cecina de chivu con kétchup de pimientos, esta postrer receta de Llión.
Enllaz direutu pa descargar el recetariu completu:
https://rutadelaplata.com/wp-content/uploads/2021/04/Gastrovia_WEB.pdf
