Retómase la espublización de la revista, que tará presente’l prósimu 22 de xunu, coincidiendo cola fin del Estáu d’Allerta motiváu pol andanciu de coronavirus
LA SIDRA.- Talo como mos comprometiéremos, una vuelta los chigres y otres empreses vinculaes a la hostelería escomenzaron abrir, la revista LA SIDRA torna a la cai, y podrá atopase de magar el 22 d’esti mes, xustamente n’acabando l’Estáu d’Allarma.
Demientres estos tres meses, nos que namás tuvo n’activo esta ueb, son munches les noticies sidreres dignes de mención, dende la suspensión de la Primer Sidre L’Añu fasta la de la Fiesta de la Sidra de Navia o’l Festival de la Sidre de Nava… tiempos duros los d’esti andanciu del que pasu ente pasu va retomándose cierta normalidá, con munchu esfuerciu y sacrificiu del seutor sidreru, pumareros, llagareros, chigres… y onde tornó a quedar n’evidencia’l nulu sofitu del “Principado”, a diferiencia de por exemplu’l casu vascu, onde’l so gobiernu apurrió 50 millones d’euros a los llagares del so país, p’aidalos a faer frente a la cris del coronavirus –arriendes de los sofitos económicos qu’apurrieron les diputaciones de Gipuzkoa y Araba-
Pero más que d’esta situación d’indefensión lo que queremos ye falar del rixu y l’enfotu del seutor pa siguir calteniendo la so actividá: el puxu a la vienta online; les iniciatives frente al coronavirus, los vasos de collorinos de la DOP, el gabitu, el portavasu chigreru, el “tu enriba, abaxu yo”; l’ afayamientu de los chigres a les desixencies sanitaries… tou un exemplu d’enfotu y vitalidá del seutor sidreru, que sal tocáu d’esti andanciu, pero con munches ganes de recuperar lo perdío y de superase… y con ellos tará la revista LA SIDRA, collaborando en tolo que seya quien.
Vémosmos esti 22 de xunu!!!
