Na tardi d’ayeri tuvo llugar la final de la III edición del concursu de la Meyor Primer Sidre l’Añu, que cuntó con una perimportante participación: 44 llagares.
LA SIDRA.- La sidre del Llagar La Morena alzóse col primer puestu con 79 puntos. Riestra, Solleiro y Los Gemelos fueron les siguientes en puntuación con 76. Siendo siete los llagares finalistes. Los yá citados y Cabueñes, Viuda de Angelón y Estrada.
La final del certame, entamáu pola revista LA SIDRA y la Fundación Asturies XXI tuvo llugar na sidrería xixonesa El Otru Mallu. El xuráu tuvo presidíu por Manuel Busto, y costituyíu por Joaquín Fernández, Ricardo Ríos y Eloy Gómez Menéndez. Pal serviciu d’echáu cuntóse con dos de los meyores echaores d’Asturies: Wilkin Aquiles y Salvador Ondó.
La sidre premiao sedrá la oficial de la VII edición de la Primer Sidre l’Añu, la espicha más grande d’Asturies y que marca l’entamu de la temporada sidrera. Cellebraráse del 24 al 27 de marzu nel Muséu del Pueblu d’Asturies en Xixón.
El premiu a la Meyor Sidre l’Añu ye l’únicu concursu que tien comu protagonista la sidre ensin trasegar. Por esa xida, ta posicionáu comu ún de los concursos de referencia de la nuesa bébora tradicional. Amás esti añu iscribiérense 44 llagares, polo que se situó comu’l segundu de los certames en cuantes a númberu participantes.
Dende va siete años LA SIDRA y la Fundación Asturies XXI escomenzaron a trabayar pola recuperanza de la sidre nuevos, práuticamente esaniciada del mercáu pola industrialización de los llagares y la xeneralización de los trasiegos. Ca vegada son más los llagares que s’animen a comercializar esta triba de sidre y que participen nesti certame.
