Daniel Ruiz, xerente del Conseyu Regulaor dende 2016, enceta los principales problemes polos qu’atraviesa’l seutor y desplica la llombarada que supondríe pa la DOP que la cutura sidrera fore reconocía pola Unesco.
LA SIDRA.- Ca añu supérense les contraetiquetas de sidre DOP del anterior, pero paez que cuesta algamar la barrera de los cinco millones, ¿cómo camienta que pue consiguise esi impulsu definitivu?
Ca vuelta más los consumidores demanden Sidre d’Asturies porque garantiza l’orixe asturianu de la mazana y una peralta calidá y esto namás pasa cola sidre DOP. Recordemos que se triplicaron los consumos DOP nos postreros seyes años y la percepción nel mercáu ye de muncha calidá.
Esti branu llancemos una campaña promocional que lleva por entítulu: «Esta etiquetina ye bien grande», por tolo que fai polos pumareros asturianos, creando bayura y emplegu na rexón, pola sostenibilidá del paisaxe… L’oxetivu ye potenciar la diferenciación col restu de sidres naturales al traviés d’una gráfica bien direuta y visual. El protagonista ye’l verde, el collor de la sidre y d’Asturies.
Buscamos amestar Sidre d’Asturies, la etiquetina y que la torna económica quede n’Asturies. El mayor impulsu sedría que los consumidores tomaren “sidre con corazón asturianu, ello ye, con materia primo autóctona”. D’esta miente los cosecheros taríen encanciaos y los llagares tamién.
