La importante firma estaduxunidense xunese a la moda caltenible y propón esti calzáu nos qu’utiliza la magaya del frutu como alternativa a la piel
LA SIDRA.- En poques ocasiones podemos escribir sobro temes de sidre y mazana rellacionaos cola moda y los enclinos de zapatos. Pero nesta ocasión la firma Tommy Hilfiger llogró que lo faigamos yá que presentó dos ‘sneakers’, ello ye, dos playeros que tienen la particularidá de tar fabricaos, en parte, coles refugayes de la mazana; lo que vien siendo la magaya de tola vida que se llogra al mayar sidra.
La marca estaduxunidense tórnse asina defensora de la moda sustentable, unde los enclinos que vamos dir viendo cómo xorrez de magar agora yá que dicha industria –siñalóse– ye altamente contaminante y ye llabor de toos faer lo que tea nes nueses manes pa curiar el planeta. Amás hai que destacar qu’estos playeros son una nueva alternativa a lo que tán fechos de piel, en sintonía con quien clamen pol usu d’ellementos de fabricación que nun supongan un perxuiciu a los animales.
Coles mesmes, esta alternativa al cueru, non solo amenorga les refugayes, sinón que tamién xenera menor impactu ambiental; y pa producilos requierse menos enerxía. Lo anterior ye por cuenta de que estos tratamientos requieren tratamientos químicos más cenciellos y menos agua.
A lo llargo de los postreros años vimos cómo la magaya pue ser reutilizada y con bones opciones d’emplegabilidá. Nesta revista espublicemos estremaes propuestes riales como pal so usu en cosmética, na ellaboración de pan y postres, y agora na fabricación de playeros. Quiciabesseya hora yá de damos cuenta de les grandes posibilidaes que tenemos al cuntar con 9.000 tonelaes de magaya ca añu que puen reutilizase xenerando riqueza al país y puestos de trabayu, esperemos que tampoco nun tornemos perder esti tren.
