Una de les semeyes incluyíes na fototeca de LA SIDRA perpasa les 3.000 impresiones
LA SIDRA.- Más de 3.300 impresiones d’una semeya en facebook, pero’l restu anden bien al empar, con una rempuesta impresionante nes redes sociales, y un seguimientu de la propia páxina web bien destacable.
Nesti casu trátase d’unes semeyes de la tonelería de José Manuel Sánchez, ’El Moyáu, en Venta Les Ranes, Villaviciosa, tonelería que llegó a fabricar pelos años 60 una media de 10 toneles mensuales, toneles que llegaben a pesar 3 tonelaes –los de 48.000 llitros, y cuyu tresllau al llugar de destín yera una auténtica odisea. Como exemplu, pa tresportar ún de los sos toneles a un llagar donostiarra, precisó llevalu per carretera pasando per Burgos y Zaragoza pa nun topar torgues pol volume de la carga.
La fototeca LA SIDRA ye una iniciativa de la Fundación Asturies XXI, que cunta col sofitu de la Conseyería de Cultura, política llingüística y turismu, y de la FMCEUP de la Casa Conceyu de Xixón, tien como oxetu la recuperanza, contestualización, dixitalización y centralización de semeyes d’enantes de 1980 rellacionaes cola sidre.
Pa esti llabor La Fundación Asturies XXI tamién cunten cola collaboración del Muséu del Pueblu d’Asturies –col que la Fundación Asturies XXI cunta con un conveniu de collaboración y un depósitu museísticu-, d’asociaciones fotográfiques como ‘Asemeyando’, y la d’un curiosu grupu collaboraores, que pasu ente pasu tan dándo-y forma y conteníos a esta iniciativa.
Pa esta Fototeca LA SIDRA, ofrécense dos posibilidaes d’aporte de material:
1.- La donación de semeyes, que pasen a integrar el fondu museísticu col que cunta la Fundación Asturies XXI nel Muséu del Pueblu d’Asturies, dixitalizándose, y entregándose al donante una reprodución física d’alta calidá y mayor formatu que l’orixinal, apurriéndose-y tamién l’archivu dixital.
2.- Facilitando la dixitalización de les semeyes, pero conservando la so propiedá física, en cuyu casu recibe tamién l’archivu dixital.
Trátase d’un proyeutu tan interesante como ambiciosu, polo que dicha Fundación fai un llamamientu a la collaboración, tantu no que cinca a organizativamente nel propiu proyeutu como al aporte de material, facilitando pa ello un corréu lletrónicu de contautu: fasturies21@gmail.com
