Afirma que dende va dos años ta rexistrada na oficina de marques y patentes estauxunidense pa protexer la marca, la sidre y el campu asturiano.
LA SIDRA.- Los documentos de Greenpeace sobro’l TTIP xeneraron allarma poles futures implicaciones que tendría la firma del tratáu tresatlánticu con respeutu de la industria alimentaria. D’ente toles áries que se ven afeutaes, la posible esapaición de les Denominaciones d’Orixe foi una de les noticies más comentaes nos postreros díis. La revista LA SIDRA púnxose en comunicación cola DOP Sidre d’Asturies pa conocer de primer man la so opinión al respeutive.
Dende’l CRDOP despliquen que nesti asuntu hai que faer dos considerances. De primeres, siñalen que magar ye verdá qu’a nivel comunitariu européu la llexislación esistente sobro les Denominaciones d’Orixe nun ta alliniada cola del mercáu estauxunidense; eso nun sinifica que la lexislación que tenemos non se vaiga siguir aplicando n’Europa. “Lo que podría asoceder ye que la proteición europea nun s’aplique nel mercáu estaduxunidense, pero n’Europa sí va siguir” afirmen. Amás, indiquen que n’Estaos Xuníos, al igual que n’España y n’Europa, esiste una oficia de patentes y marques: la United States Patent and Trademark Office —USPTO—. La DOP Sidre d’Asturies ta rexistrada ende dende va dos años. De manera que tamién tendríe proteición nel continente americanu.
“Que n’Estaos Xuníos nun s’acepten les lleis comunitaries europees nun quier dicir qu’equí vaigan sumir. Y eso tampoco nun sinifica que les Denominaciones d’Orixe nun vaigan lluchar polos sos drechos nesti asuntu. N’Europa hai más de 3.000 y nun van quedar de brazos cruzaos énte una situación que pueda perxudicalos. La DOP Sidre d’Asturies ta rexistrada dende va dos años na USPTO. Eso féxose porque nel so momentu la DOP Sidre d’Asturies atalantó qu’el mercáu estauxunidense yera interesante pa rializar inversiones; y tamién pa protexer la marca Sidre d’Asturies, que ye protexer los intereses del campu asturianu y de la sidre asturiano” repiten.
