Juan Manuel Lamelas, “Juanín”, (Olloniegu, 1952), güei na Sidrería Asturias – Xixón- encarna a la perfeición la figura del chigreru de tola vida.
Siente señardá de los sos años de guaje cuando con ocho años echaba sidre nel chigre que los sos pas rexentaben na plaza de Requexu. Esi foi l’entamu d’una vida que, en faciendo la mili y pasar nueve años trabayando colos estelleros, lu apasionába y por eso, decidió retomala, montando, en xunetu de 1983, la sidrería Asturias, a escasos metros de la sablera de San Llorienzo, xunta la so muyer Anabella. Agora yá piensa nel futuru del negociu, cuya continuidá ta garantizada gracies a los sos dos fíos: Daniel y Anabella.
Escomencemos pel principiu…
Con trés años, los mios pas teníen el chigre Miño n’Olloniegu y dende piqueñu yá andaba pel chigre, pero nun foi fasta los ocho años cuando se treslladaron a Mieres y montaron el chigre Miño na plaza Requexu cuando eescomencé a echar sidre. De primeres, nun podía cuasique nin cola botella, pero deprendí porque paraben ellí unos veceros que queríen que la echara yo, asina que nun escomencé con agua si non con sidre y como nun se me dio mal, ende sigo, fasta güei.
