El conocíu xef y escritor suecu concedió a LA SIDRA una entrevista demientres la so visita a Asturies.
LA SIDRA.- El númberu d’agostu de la revista LA SIDRA cunta con una perinteresante entrevista a Jonas Borssén -rializada por Estíbaliz Urquiola- na qu’esti declárase un namoráu de la sidre y afirma que-y prestaríe aidar a esparder la so cultura.
De reconocíu prestixu internacional, gallardonáu pola Academia de Gastronomía Sueca poles sos anovaores contribuciones culinaries y tamién pole sos obres lliteraries, anguañu ye’l presidente y editor de The Swedish Chile Pepper Association; y tamién foi reconocíu pola Confrérie du Piment d’Espelette en Francia pol so trabayu en cuantu a pimientos se refier. Nos postreros cinco años lleva trabayando nun proyeutu más estensu de festivales gastronómicos nel que s’inclúi la sidre y el Festival de la Sidre de Nava.
Na entrevista desplica la so visión de la sidre en xeneral y de l’asturiana en particular, acabando con una frase que ye toa una denuncia de la situación d’aisllamientu que carecemos n’Asturies: “hai que poner una ruta aéria ente Estocolmu y Asturies”.
Per agora yá anuncia la posibilidá de participar nel prósimu Salón Internacional de les Sidres de Gala (SISGA), que se cellebrará en Xixón del 30 setiembre al 2 d’ochobre.
