Qué deseya pal seutor sidreru el Direutor de Desendolcu Rural y Agroalimentación nesti nuevu añu.
LA SIDRA.- Jesús Casas: “N’Asturies el retu ye l’afitamientu de la sidre con Denominación d’Orixe, como referente cotidianu de la sidre. La voluntá ye que progresivamente ocupe un rangu mayor nel porcentaxe total de sidre que se consume, calteniendo los altos estándares de calidá y asegurando la so vinculación col territoriu y cola xente. L’afitamientu de la sidre d’orixe asturianu ye la meyor forma de consolidar un paisaxe, una cultura, y una forma d’entender el desendolcu rural. El segundu deseyu ye’l de proyeición comercial. El seutor tien qu’españar y proyeutase fora d’Asturies. La sidre asturiano tien que ganar presencia y reconocencia en mercaos nacionales ya internacionales allende los mares y los cordales”.
Tocántenes a proyeutos pal prósimu añu’l director indicó: “Los proyeutos son munchos, pero quiero referime a dos custiones concretes que son el llóxicu corolariu de lo enantes señalao. En primer llugar tratar d’avanzar y enforma na incorporación de llagares y sidres a la denominación d’orixe, convirtiéndola na protagonista de la rialidá sidrera asturiana. Y en segundu llugar da-y puxu, nel contestu de produiciones de calidá, una presencia mayor nel esterior. Foros, feries, certames, tienen de ser escenarios onde teamos presente siempres un productu que ye obligáu venceyar cola concenxa emocional y sentimental del inmaterial asturianu. Al tiempu hai que siguir sofitando la Mesa de la Mazana, como foru nel que tán presentes tolos seutores implicaos, dende productores a ellaboradores, y tamién la comunidá científica, como’l meyor escenariu pa plantegar les cuestiones presentes y avanzar, de común alcuerdu, na so solución”.
