El primer accésit foi pa José Romero, seguíu d’Agustín Gurruchaga; la mención especial JR foi pa Nuria Campos.
LA SIDRA.- El pasáu 30 xieneru llevóse a cabu’l fallu del XIConcursu de Semeyes LA SIDRA convocáu por esta revista y la Fundación Asturies XXI, col padrociniu del Llagar JR; y que tamién cunta cola collaboración de l’Asociación Fotográfica Asemeyando.
El xuráu tuvo compuetu polos fotógrafos José Pañeda Alberto Otero; Aurora Vigil.Escalera, direutora de la galería d’arte del mesmu nome; Pedro Gutiérrez, vicepresidente de la FAAF, presidente del Grupu Zona 5 de Xixón y coentamaor de los alcuentros fotográficos de Xixón. El presidente del tribunal foi Luis J. Vigil-Escalera Quintanal, Presidente de la FAAF y d’Asemeyando Asociación fotográfica. Hai de solliñar que la votación y fallu fueron abiertos al públicu que quinxo averase fasta les istalaciones de la revista, talo y como s’anunció nes redes sociales, nesta páxina ueb y na edición impresa.
Asina, Javier Álvarez Pastrana cola so obra “Escanciando” féxose col primer premiu dotáu con 700 euros y medalla d’oru de la CEF. José Miguel Romero Barco algamó’l segundu premiu con “Sagarra 4”, Esti reconocimientu tuvo dotáu con 250 € y medalla plata de la CEF. El segundu accésit -150 € y medalla bronce de la CER- foi pa José Agustín Gurruchaga pola so istantánia “Hoy toca manzana”. Finalmente, la mención especial JR dotada con dos caxes de sidre del mencionáu llagar, algamóla Nuria Campos con “Escanciando”.
A destacar qu’esti concursu cunta cola reconocencia del Confederación Española de Fotografía –CEF- y de la Federación Asturiana d’Asociaciones Fotográfiques –FAAF-; amás del sofitu del llagar JR y de la collaboración de la Sidrería La Galana. Esti añu, como novedá, la forma de presentación y esbilla de les obres rializóse al traviés d’una plataforma dixital especializada en concursos de semeyes que facilita la participación del mesmu y que garantiza en tou momentu l’anonimatu de los concursos y la tresparencia del certame. En total presentáronse 171 semeyes de 52 autores. ¡Norabona a toos!
